Previous Next

SORUMUTU SUA EXÉLENSIA MINISTRU EDUKASAUN, JUVENTUDE NO DESPORTU HAMUTUK HO SEKRETÁRIA REGIONAL BA EDUKASAUN NO SOLIDARIEDADE SOSIÁL NO EKIPA HOSI REJIAUN ADMINISTRATIVA ESPECIAL OECUSSE AMBENO, RAEOA.

 
Dili, 7 de Setembro de 2020 – Sua Exélensia Ministru Edukasaun, Juventude no Desportu, Dr. Armindo Maia simu vizita hosi Sekretária Regional Ba Edukasaun no Solidariedade Sosiál, Sra. Abelina da Costa no ekipa hosi Rejiaun Administrativa Espesiál Oecusse Ambeno, RAEOA iha edifisiu MEJD, Vila-Verde, Dili. Iha sorumutu ne’e, Sekretária Regional Ba Edukasaun no Solidariedade Sosiál aktualiza informasaun sobre situasaun Edukasaun iha RAEOA. Sra. Abelina hato’o katak, 85% eskola sira iha Rejiaun Administrativa Espesiál ne’e reabertura ona, no atividade prevensaun ba COVID-19 liuliu iha eskola sira besik fronteira mak hanesan iha Passabe, Oe-silo no Nitibe lao nafatin, liuliu rega dezinfektan no medida prevensaun seluk tuir nafatin protokolu Ministériu Saúde nian. Sekretária Regional Ba Edukasaun hatutan tan katak, sira simu ona orientasaun kona-ba Kalendáriu izame Nasionál liuliu ba 9oano no 12oano. Iha biban ne’e, Dirijente ne’e hato’o mós dezafiu hirak ne’ebé sira enfrenta liuliu iha setór importante ne’e liuliu kona-ba formasaun ba manorin sira ne’ebé para hela, subsidiu ba manorin sira liuliu iha área remota sira mós para hela no infrastutura eskola ne’ebé sei menus.
Sua Exélensia Ministru agradese ba visita ne’e no apresia ba servisu ne’ebé ekipa halo hodi reabertura fali eskola sira. Sua Exélensia Ministru husu atu nafatin halo prevensaun no protesaun ba aluno sira durante surtu COVID-19. Hatan ba dezafiu sira ne’ebé apresenta, Sua Exélensia Ministru Edukasaun, Juventude no Desportu sei servisu hamutuk nafatin atu buka solusaun hodi minimiza dezafiu hirak ne’e.
Tuir planu katak Sekretariadu Regional Ba Edukasaun no Solidariedade Sosiál sei halo atividade hanesan Semináriu nasional kona-ba edukasaun ida hodi komemora ‘mês de educação’ ne’ebé sei selebra iha fulan Outubru, no sei Konvida Sua Exélensia Ministru Edukasaun, Juventude no Desportu, Dr. Armindo Maia hodi sai hanesan orador ba seminariu refere.
#Mídia Gab_Mim_0792020

Imprimir   Email