Reativa Aprendizajen, Governu Sei Foti Asaun Hasoru Eskola Dez-Obedensia

Dili, 9 Janeiru 2021 (Sapientia)- Governu liuhosi Ministériu Edukasaun Juventude no Desportu (MEJD) servisu hamutuk ho Ministériu Saúde (MS) asina ona diploma ministerial hodi regula eskola sira bainhira hahú fali prosesu aprendizajen iha loron 13 Janeiru, no ba eskola ne’ebé la kumpre protokolu saúde bazeia ba dekretu governu ne’ebé iha maka governu sei foti asaun hasoru eskola refere.

Ministru Edukasaun Juventude no Desportu (MEJD), Armindo Maia afirma halo ona akordu ho ministériu saúde hodi hala’o kontrolu ba eskola sira bainhira komesa fali ona prosesu aprendizajen.

“Ha’u ho ministériu saúde asina ona diploma ministerial konjuntu, ha’u hanoin segunda feira bele públika ona iha jornál da repúblika, ne’ebé maka sei regula detalliamente eskola sira,” MEJD Armindo ba jornalista iha Pallasu Governu hafoin partisipa enkontru ezekutivu, sesta (08/01).

Alende ne’e nia mós informa katak kona-ba sirkulár ne’ebé sai iha loron 5 foin lalais ne’e husu ba eskola sira bele hala’o prosesu aprendizajen maibé tenke kumpre nafatin regra ne’ebé iha.

Argumenta nia, maski prosesu aprendizajen la’o hela maibé diploma ne’ebé sai sei regula hotu atividade sira iha eskola, hodi husu nafatin ba eskola públiku no privadu no seluk tan atu kumpre regra tuir dekretu governu ne’ebé iha tiha ona.

“Atividade prosesu aprendizajen balun la’o hela, maibé diploma ministerial sai sei regula hotu no orientasaun katak labele tau ema barak (distánsia fíziku, uza máskara no prepara bee fase liman). Iha dia 13 fulan ne’e inisiu anu letivu, mestre ho estudante sira sei tama hanesan bain-bain hodi halo limpeza no hatuur meza kadeira ho distánsia, no iha dia 18 maka hala’o prosesu ensinu aprendizajen,” informa nia

Ikus governante ne’e mós reforsa hodi informa, liga-ba material ka ekipamentu protesaun hodi prevene propagasaun pandemic COVID-19, governu prepara hotu tiha ona no hetan apoiu mós hosi parseiru sira atu fornese ba eskola iha territóriu laran tomak.

“Ami hetan apoiu husi parseiru dezenvolvimentu (hanesan) hosi embaixada no mós komunidade salezianu Dom Bosco sira, ne’ebé ho númeru rihun 600 hanesan ne’e, bainhira la obedese ba regra maka sei regula iha diploma ministerial nia laran,” tenik nia

 

Media.Gab.Min : João Bosco Xavier Carvalho


Imprimir   Email