Previous Next

MINÍSTERIO EDUKASAUN JUVENTUDE NO DESPORTO SEI APOIO NO ESFORSU ATU TULUN FO FORMASAUN EDUKASAUN FORMAL BA ASOSIASAUN HALIBUR DEFISIENSIA MATAN TIMOR-LESTE, AHDMTL

 
Dili, 10 de Setembro de 2020 – Sua Exélensia Ministru Edukasaun, Juventude no Desportu, Dr. Armindo Maia simu vizita hosi Jestór Programa Asosiasaun Halibur Defisiensia Matan Timor-Leste, AHDMTL no ekipa. Ministériu Edukasaun, Juventude no Desportu foti ona medida atu aumenta asesu ba edukasaun ba ema ho defisiénsia sira, maibé área ne’e presiza tebtebes atu hadi’ak liután. Iha sorumutu ida ne’e, Jestór Programa AHDMTL, Sr. Luciano Borges relata ba Ministru Edukasaun, Juventude no Desportu kona- vizaun, misaun no programa ne’ebé AHDMTL agora dadaun halo atu apoiu no motiva ninia maluk Defisiente Matan iha Timor-Leste. Jestór ne’e hatutan tan katak, númeru ema ho defisiente matan iha Timor-Leste hamutuk 14,828. Iha biban ida ne’e Sr. Luciano Borges mós hato’o AHMDTL nian preukupasaun liuliu kona-ba laiha printer Barille atu print materia sira, formador voluntariu sira ne’ebé halo servisu to’o agora, insfraestrutura ne’ebé sei menus, no husu atu oinsá bele hadi’ak liu tan edukasaun formal nian liuliu ba ema ho defisiensia matan. Hatan ba preukupasaun hirak ne’e hotu, Sua Exélensia Ministru Edukasaun, Juventude no Desportu hateten katak ita hakarak sidadaun Timor oan hotu iha oportunidade hanesan atu partisipa iha prosesu aprendizajen ho kualidade no iha maneira ne’ebé ajuda sira hetan susesu eskolár. Tanba ida ne’e, Ministériu Edukasaun, Juventude no Desportu (MEJD) iha unidade ida mak hare liu kona-ba edukasaun inklusivu. Kona-ba preukupasaun AHDMTL, MEJD sei servisu hamutuk ho AHMDTL oinsá bele hare hamutuk assuntu refere no buka solusaun hamutuk. MEJD sei esforsu nafatin maske neneik maibé tenki bebeik. Sua Exélensia Ministru apresia tebes ba Asosiasaun ida ne’e no ema hotu ne’ebé hamahan aan iha AHMDTL ne’e, tanba sai ona inspiradór ba maluk defisiente matan sira seluk.

Imprimir   Email