Loron 29 Setembru, Embaxador Thailandia Sei Atribui Premiu ba Prof. Vicente da Silva Marcal

Baucau, 06 Agostu 2021(Sapiénsia) – Diretór eskola Ensinu Báziku Sentrál númeru 1 Baucau, Vicente da Silva Marcal, sai vensedór  ba prémiu Maha  Chakri, hanesan mellor profesór  ba tinan 2021, tanba ne’e  tempu badak estadu reinu Tailándia liu hosi Embaixada iha Dili, sei atribui prémiu.

Nune’e manan na’in  sente haksolok no rekoñese susesu ne’ebé nia hetan  liu hosi esforsu hamutuk entre alunu, profesór  no Inan -Aman  sira iha kompremitidu utiliza osan hosi prémiu hodi kontribui ba eskola.

“Ha’u atu sosa tratór hodi halo natar iha ha’u nia rai Buruma ne’ebé luan tebes atu reforsa programa merenda eskolár  no mós atu minimiza alunu sai husi eskola  (drop out), tanba ikus mai alunu barak sai hosi  uma la mai eskola   ho ekonomia   ne’ebé fraku tebes,” Diretór eskola hateten  iha  resintu  eskola , Tirilolo , Baucau, sesta ne’e.

Vicente dehan, merenda eskolár  sei suporta ba pré- eskolár Buruma, Ensinu Báziku   turma 1 no 2,  nune’e mós sei reabilita eskola Ensinu Báziku  Filial Lutu- Mutu   no pré- eskolár Buruma ne’ebé  ho kondisaun ne’ebé ladun konfortável, didin ho bebak no  estudante sira tuur iha rai.

“nu’udar Diretór eskola, ha’u sente ladun dignu,” nia akresenta.

Prémiu ne’ebé  oferese prinseza  Maha Chakri  Sirindhorn hosi Tailándia, hanesan medalla ida no osan hamutuk $10.000.

 “karik iha oportunidade  no buat hotu la’o di’ak, prinseza  Tailándia Maha Chakri  sei vizita,”Vicente hatutan.

Prémiu sei entrega iha 29 setebru

Iha fatin hanesan, Embaixadór  Tailándia  iha Timor-Leste  Ekapol  poolpipat, hatete , Tailándia nafatin iha komprimisu atu koopera ho

Timor-Leste iha area Edukasaiun.

Liu hosi aprezentasaun profesór  Vicente, dehan sei hadia eskola no sei hola tratór, maibé husu atu habelar liutan  koñesimentu profesór sira durante hanorin iha klase”’ eskapol enkoraja.

Prémiu mellor  profesór Maha  Chakri, tuir lolos sei entrega  direita hosi prinseza Tailándia, maibé tanba situasaun pandemia,  maka sei realiza serimónia entrega iha embaixada Tailándia iha  Dili, iha loron 29 setembru.

Alende ne’e, objetivu embaixada Ekapol vizita eskola Ensinu Báziku  Sentrál númeru 1 Baucau atu observa direita atividade estudante relasiona siénsia no atividade extra ne’ebé oferese hosi profesór inkliu dedikasaun hosi profesór Vicente.

Vise Ministru sente orgullu

Iha biban hanesan, Vise Ministru Edukasaun Juventu no Desportu (MEJD) António  Guterres, orgullu ho profesór Vicente, ne’ebé sai manan na’in.

“orgullu hanesan nasaun ida ne’ebé  hetan rekoñesimentu ba ita nia edukadór sira hosi señora prinseza”, Vise- Ministru apresia.

Tuir governante ne’e, Governu liuhosi MEJD halo kooperasaun  ho Governu Tailandéz  ligadu ho asuntu atribuisaun prémiu, ho objetivu atu hasa’e kredibilidade profesór sira iha nivél mundiál.

Ida ne’e hatudu Timor-Leste nia profesór mós  la lakon kompete  ho profesór hosi nasaun seluk, tanba  ne’e mai vizita Baucau  hodi haree kondisaun eskola no iha tempu hanesan apresia profesór Vicente nu’udar mós Diretór eskola ne’ebé selesionadu hanesan mellor profesór ba tinan 2021”, nia tenik.

Vise- Minisrtu mai vizita   Eskola Baziku Sentrál númeru 1 Baucau atu koordena no preparasaun ba serimónia  atribuisaun prémiu nian iha Dili

Nia konsidera , atribuisaun prémiu ne’e bele fó motivasaun ba profesór  iha Timor-Leste ne’ebé tuir dadus  nasionál  por volta 14.000 resin.

Governante ne’e dehan, MEJD iha responsabilidade boot kontinua fó promosaun, promove, formasaun hosi tinan, tempu ba tempu, neneik ba bebeik nafatin mellora kualidade profesór  sira tanba nu’udar save no sentru ba formasaun.

“Tailándia oferese prémiu ne’e nu’udar modelu janela ba Edukasaun Timor-Leste,”Antønio subliña.

Prinseza Tailándia, Maha Chakri  kada tinan rua oferese prémiu melllor ba profesór sira iha nasaun 11 iha sudeste Aziátiku, nune’e profesór   Vicente hanesan ema dahaat ne’ebé hetan prémiu ne’e.

Prinseza Maha Chakri hanesan oan hosi Liurai Tailándia ne’ebé mak fó atensaun másimu ba edukasaun no sai mós nu’udar Dosente iha Universidade Militár iha Tailándia. (media gab.min.Ester Pinto)


Imprimir   Email