Atividade

MEJD, hahu lansa projeitu komunitaria 21 iha Munisipiu Bobonaro

Atuaben, Bobonaro 14 Outubru 2021, (Sapientia)-Ministru Edukasaun Juventude no Desportu, Armindo Maia, ba sira ne’ebe hetan projeitu komunitariu, governu diside fo projeitu ne’e komunidade  tanba governu hakarak fo servisu ba ninia komunidade liu hosi projeitu komunitaria.

Governu hakarak, projeitu ne’ebe komunidade kaer,  bele halo ho kualidade tanba komunidade pertense iha Suku/Aldeia refere entaun iha sentidu pretense. No iha responsabilidade.

Maske halo husi komunidade maibe, governu liu husi Ministeriu Edukasaun Juventude no Deportu, sei fiskaliza no superviziona nafatin, atu labele sakrifika fali kualidade. Projeitu bele baratu maibe kualiade tenke garante atu bele dura to’o tinan 20-30 mai.

Eskola pakote referendum ne’ebe halo iha tinan 2015 liu ba, kondisaun aat hotu ona. MEJD lakohi akontese kualidade hanesan ne’e. hakarak katak eskola ne’e tenke dura tempo naruk.

Ba timor laran tomak, tinan idane’e orsamentu ba projeitu komunitariu  serka vinte milloens kuatru sentus liu. Ba projeitu hamutuk 204. Munisipiu Bobonaro, hetan 21 projeitu.

Ida ne’e kuprimisu no komitmentu governu oinsa maka bele kria kondisaun diak ba ita nia oan sira.

Projeitu seluk tan hanaran BEST. Ne’e mos konsentra ba ensinu baziku. Orsamentu mai husi banku mundial, metade husi orsamentu ne’e governu hetan liu husi imprestimu, no 8 milloens banku mundial fo gratuitu. Ne’e sei hahu iha  tinan 2023.

Osan ne’e povu nian, governu halo jestaun deit. Ne’eduni husu ba komunidade tomak atu halo projeitu sira ne’e ho  kualidade.

Diretor Edukasaun Munisipiu Bobonaro, Crispin informa katak, projeitu ida ne’e postu 6 iha Munisipiu Bobonaro hetan hotu, parte Edukasaun Munisipiu, hala’o ona enkontru ho Diretor no koordenador eskola sira hotu, husi enkontru ida ne’e ami koalia kona ba infraestrutura, kurrikulu, asuntu rekursu humanu, no jestaun finanseiru.

Ligadu assuntu infraestrutura, edukasaun Munisipiu Bobonaro, rekolha ona dadus barak neebe iha tempo liu ba Munisipiu aprezenta ona proposta ba MEJD, projeitu hamutuk 52. Ba tinan 2022-2023, antes ne’e, edukasaun Bobonaro hala’o ona konfirmasaun Dirasaun Nasinonal Infraestrutura Edukativa. Ho rezultadu katak, tinan 2021, edukasaun Munisipiu Bobonaro sei hetan projeitu 21.

Ne’eduni, Edukasaun Munisipiu Bobonaro hato’o agradese wa’in ba MEJD liliu ba Ministru no dirijente Dirasaun Infraestrutura Edukativa

Iha fatin hanesan Diretor Jeral Parseria Infraestrutura MEJD, Odilia Freitas hateten, tinan ida ne’e Munisipiu Bobonaro, sei hetan projeitu komunitariu hamutuk 21. Proposta husi Munisipiu Bobonaro barak duni, la’os la hetan konsiderasaun maibe fazeadamente MEJD sei haree fali iha tinan 2022-2023.

Tan ba pulitik oitavu governu  iha hanoin katak, MEJD sei konstrui eskola hamutuk mill kinentus sala aula ba iha tinan lima durante mandatu oitavu governu ninian.

Tinan kotuk la konsege la’o liliu infraestrutura, tanba afeta moras Covid-19 iha ita nia leet. Projeitu 21 ne’ebe sei hala’o iha Munisipiu Bobonaro, sei kobre orsamentu dois milloens kuatru sentus nove kinentus  doze pontu trez sentavus.

Tuir matadalan ne’ebe MEJD sensibiliza ona ba Diretor no koordenador eskola sira, matadalan ne’e maka sei implementa iha projeitu komunitaria.

Komunidade sira tenke harii grupo no MEJD sei transfere osan mai iha konta bankaria grupo ninian atu ezekuta ba konstrusaun/reabilitasaun obra sira ne’e.

Ne’eduni tenke iha responsabilidade atu garantia kualidade servisu, at garantia prosesu aprendizajem iha tempo naruk mai.

João Bosco

Koordenador EBF Suku Karabau, husu MEJD estabelese EBC

 

Karabau, Bobonaro 14 Outubru 2021, (Sapientia)-Koordenador Eskola Ensinu Baziku Filial Suku Karabau, Informa ba Ministru Edukasaun Juventude no Desportu Armindo Maia katak, Iha Suku Karabau eskola Ensinu Baziku Filial. Maibe, sei infrenta difikuldade barak hanesan profesór/a reklamadu sira ne’ebe to’o ohin loron seidauk resolve fo impaktu boot ba prosesu aprendizajem iha eskola ensinu baziku filial Suku Karabau.

Nuudar humanu, sira mos sente hamlaha, sira mos iha nesesidade familia no nesesidade  sira seluk tan.ne’eduni husi ba Ministeriu Edukasaun Juventude no Desportu atu tau atensaun ba problema professor reklamante sira ne’e.

Rekomenda mos ba MEJD, ba future haree mos ba Ensinu pré-Sekundáriu. tanba durante ne’e  ami estudante barak hela iha distansia dook labele asesu ba ensinu pre-sekundariu. Wainhira iha tempo udan, sira labele ba eskola tanba mota tun impede la ba eskola.

Númeru Profesór/a ne’ebe hanorin iha EBF Karabau hamutuk ema na’in 48. No maioria simu ona vasina. Falta na’in 7 maka seidauk simu vasina ho razaun katak, balun moras tensaun, moras isin rua, no balun sofre moras asma.

Eskola fo motivasaun nafatin ba professor hirak ne’e atu wainhira rekupera ona tenke ba simu vasina.

Kona ba vasinasaun ba estudante  ho idade 12 ba leten, EBF Karabau, hatama tiha ona lista alunus ba iha edukasaun Munisipiu no Saude Munisipiu

Koordenador ne’e husu ba MEJD atu estabelese Ensinu báziku  Central iha Suku Karabau, tanba Suku karabau bele kobre mos area Postu Adminiztrativu Zumalae, Munisipiu Covalima nian, suku rua ne’e hela besik malu, nia oan sir aba buka eskola pre-sekundaria dook teb-tebes ne’eduni presija tebes estabelese EBC ida iha Suku Karabau atu bele asistensia ba Suku Karabau no Postu Administrativu Zumalae nia oan sira.

Hatan preokupasaun professor EBF Karabau kona ba estabelese tan EBC ida iha Suku Karabau, katak MEJD simu ona proposta husi eskola, maibe presija estuda no haree mos númeru populasaun iha Suku Karabau, EBF hira maka lokaliza iha area ida ne’e, estudante potensialmente hira, karik bele loke hanesan klase paralela ida, husi terseiru siklu. Ida ne’e MEJD hanoin hela. Tanba iha fatin seluk mos husu hanesan ne’e hotu. Tanba ne’e maka MEJD tenke halo analiza sira nia proposta atu ita bele loke tuir nesesidade ne’ebe iha.

Agradese ba MEJD ne’ebe hakat ona mai iha ami nia Suku Karabau no haree kondisaun moris populasaun Suku Karabau nian.

Media. Gab. Min. MEJD: João Bosco Xavier Carvalho

MEJD: husu Komunidade atu tauk moras, labele tauk Vasina

 

Suku Carabau, Bobonaro 14 Outubru 2021, (Sapientia)-Ministru Edukasaun Juventude no Desportu, Armindo Maia, iha nia diskursu hateten, MEJD nuuder reprezenta governu tomak iha Suku Karabau, atu haklaken informasaun kona ba vasinasaun ba komunidade sira tomak  iha Suku Karabau nian

Tanba moras Corona ne’e moras aat ida no halo ema mate, halo ema moras. Impede dezenolvimentu.

Ita tauk, tauk moras. Vasina ne’e aimoruk ida ne’ebe atu tahan ita nia  isin husi moras. Husu komundade sira atu labele tauk vasina. Objetivu vasina ne’e atu tahan moras Covid husi ita nia isin lolon. Hanesan Forsa F-FDTL no PNTL vasina  hotu ona inklui infermeiru no Doutor sira mos vasina hotu ona.

Laiha governu ida maka hanoin aat ba nia povu rasik. Governu hakarak populasaun tomak livre husi moras aat ida ne’e. tanba ne’e  maka Primeiru Ministru haruka membru governo hotu-hotu tuun ba terrenu hodi fo informasaun loloos ba komunidade sira atu populasaun sira sente klareza labele fiar informasaun bosok husi ema iresponsabilidade sira ne’ebe hakarak lohi povu labele simu vasina.

Governu hakarak ukun povu, no hakarak povo maka halo dezenvolvimentu la’os mai halo mate fali povu, se maka atu hala’o dezenvolvimentu lori  rai ida ne’e ba oin?

Mora ida ne’e la’os timor maka iventa iha ne’e maibe,  iha mundu tomak afeta moras ida ne’e, mundo tomak sai vitima ba moras ida ne’e. ema tokon barak maka mate ona, ema tokon barak  maka tama izolamentu, iha nasaun barak nia populasan ba simu vasina tenke selu, ita Timor, gratuita tanba sa, maka ita tauk fali?

Governu esforsu tomak taka fronteira, serka sanitaria, labele movimentu la’o ba mai, no konsege hatun númeru ema mate ne’e to’o ohin loron hamutuk ema na’in 119. Ne’e hatudu katak moras ida ne’e perikozu tebes.

Liliu ba ferik no katuas sira, jovem sira, favor tenke ba simu vasina. Governu hakarak salva nia ema. Governu presija ema ne’ebe isin diak, isin forte atu bele servisu ba nia aan, nia familia, ba sosiedade, no ba nasaun tomak nian.

Ba jornalista sira, iha eskola bazika filial Karabau, hanesan sentru ba vasinasaun ba Suku Karabau. Komunidade entuziasmo teb-tebes. Suku karabau, ho nia númeru populasaun ne’ebe boot. Ita esprea katak, númeru vasina bele aumenta barak liu tan hanesan iha Suku sira seluk iha Postu Administrativu Bobonaro

Ita kontente tanba komunidade agora kumpriende vantajem vasina. Durante ne’e sira konsumu lia bosok sira, maibe hafoin rona esplikasaun husi kampanha ne’e komunidade sira sente konvensidu tebes katak governu koalia ne’e mak loos.

Kona ba vasina Pfizer, Ministru Armindo Maia hateten, Ministériu Edukasaun Juventude no Desportu, servisu hamutuk ho Ministériu Saude, lista husi estudante ho idade, 12-18, husi eskola hatama ona iha Munisipiu sira.

Iha semana ne’e MEJD sei simu aimoruk vasina Pfizer iha Aeroportu Dili, no iha fulan Novembru laran  ba oin sei distribui ba eskola sira.

Reprezenta Xefi Suku Carabau, durante ne’e, komunidade Suku Karabau hein informasaun kona ba vasinasaun atu prevene moras Corona-19.

Ho  prezensa Ministru Edukasaun Juventude no Desportu, komunidade Suku karabau hato’o mos difikuldade iha suku kona ba Edukasaun nian. Iha Suku ne’e iha Aldeia 5. Total uma kain 60. No total populasaun hamutuk 4000.

Reprezentante Ministériu  Saude, Gil da Costa afirma katak, bazeia rezultadu ne’ebe ekipa Ministeriu saude hetan iha terrenu, katak populasaun Suku Karabau barak tebes kompara ho Suku sira seluk iha Postu Administrativu Bobonaro laran.

Suku Karabau iha Aldeia lima (5), maibe rezultadu kampaña vasina hatudu katak, ema ne’ebe simu vasina númeru kiik liu kompara ho Suku sira seluk iha Postu administrative Bobonaro

Entretantu, populasaun suku karabau haktuir katak, durante sira la ba simu vasina tanba tauk no rona informasaun falsu sira katak vasina ne’e bele hamate ema no hamenus jerasaun sira iha future mai.

Gil, Akresenta liu tan katak, governante sira hetan vasina hotu ona, inklui Amo Bispo sira no Padre madre barak simu hotu ona vasina. Maibe to’o ohin loron seidauk hetan moras ka mate, ne’e hatudu katak, vasina ne’e diak atu prevene moras Covid no hasa’e ita nia imunidade atu hases an husi moras refere.

Ne’e duni husu ba komunidade sira atu labele rona informasaun falsa sira ne’e. informasaun sira ne’ebe lansa iha media social sira ne’e, ema ne’ebe iresponsabiliade no laiha maturidade hanoin povu.

Informasaun loos maka oras ne’e dadaun Ministru Edukasaun Juventude no Desportu reprezenta Governu mai haklaken ne’e maka loos. Vasina la’os foin maka akontese ba ita. Maibe, hahú husi ita moris mai, vasina kedas. Tuir loloos ita ema boot labele ona vasina maibe tanba moras pandemia afeita mundo tomak. No mundo tomak preokupa ba ninia sidadaun ne’e maka governu Timor-Leste hakarak ninia sidadaun sira livre husi moras aat ida ne’e.

Entretantu, iha kampaña vasinasaun ne’e Xefi Suku Karabau la marka prezensa iha iventu refere halo komunidade sira preokupa. Populasaun sira dezorganizadu liliu kona ba informasaun moras Covid ninian.

Lider komunitaria suku ne’e nian nunka fahe informasaun kona ba programa governu nian inklui dezenvolvimentu sira.

Komunidade iha Suku ne’e hakarak koopera ho Governu no pronto apoiu governu atu hala’o dezenvolvimentu iha Suku Karabau laran. Importante koordena malu antes implementa programa sira iha Suku Laran.

 

Media Gab.Min. MEJD: João Bosco Xavier Carvalho

Aimoruk Vasina Pfizer doze rihun atus ida liu to’o iha Timor-Leste

Dili, 16 Outubru 2021, (Sapientia)-Ho chegada dahuluk aimoruk vasina pfier, ne hatudu katak, relasaun amizade entre nasaun Timor-Leste ho Estadu Unido Amérika boot teb-tebes. Estadu Unidu Amérika, nasaun ida ne’ebe riku no forte teb-tebes,  hakarak tulun Timor-Leste  tanba timor hanesan nasaun sira seluk mos presija vasina Pfizer ba labarik sira.

Ne’eduni hanesan Ministru Edukasaun Juventude no Desportu, hakarak  hato’o obrigadu wa’in ba governu Estadu Unidu Amérika,  liu husi COVAD Fasility, nune’e mos ba parseiru sira seluk hanesan Unicef, WHO, ne’ebe fasilita ona vasina Pfizer mai timor, doze hamutuk rihun atus ida liu.

Ministru Edukasaun Juventude no Desportu (MEJD), Armindo Maia ba jornalista sira iha Aeroportu Internasional Nicolau Lobato katak, vasina pfizer importante no sei lori benefisiu boot teb-tebes ba labarik timor oan sira besik rihun lima nulu maka sei sai benefisia ba vasina Pfizer ne’e. sei fahe ba doze rua.

Kona ba preparasaun, durante ne’e MEJD hala’o ona preparasaun ho Ministeriu Saude, eskola sira informadu hotu ona kona ba vasina Pfizer ne’e, no hein katak semana dahuluk fulan Novembru nian bele hahu vasina ona.

Kona ba lansamentu vasina Pfizer, MEJD sei koordena hamutuk ho Ministeriu Saude, maibe Ministeriu Edukasaun rasik pronto ona karik vasina ne’e hala’o iha eskola sira.

MEJD iha esperansa katak, estudante sira sei partisipa másimu. Iha mos katak, labarik  sira ho minoridade, presija konsientimentu husi inan ho aman sira. MEJD fiar katak, inan ho aman la sai obstaklu ba vasina estudante sira.

Vasina atu salva ita nia oan sira, boot  sira vasina tiha ona, entaun governu mos hanoin atu labarik sira ho idade 12 até tinan 18, bele simu vasina.

Prosedimentu formulariu iha tiha ona, entre Ministeriu  Saude maka sei responsabiliza iventu ida ne’e.

tanba vasina idane’e, 90% sei destina ba labarik sira ne’ebe ho idade 12 até 17. Ne’e maka MInisteriu Edukasaun servisu hamutuk ho Ministeriu Saude, kria ona kondisaun ba eskola sira hotu, no fo ona orientasaun ba eskola sira atu bele kumesa ona kria espasu fo atendimentu ba estudante sira atu simu vasina Pfizer ne’e.

Ba estudante sira, atividade vasinasaun sei hala’o iha eskola. Entaun eskola tenke kondisaun di’ak nune’e bele hala’o vasina.

Media. Gab. Min. MEJD : João Bosco Xavier Carvalho

Mensajem MEJD ba Vasinasaun Pfizer ba Estudante sira

Dili, 16 Outubru 2021, (Sapientia)-Ministru Edukasaun Juventude no Desportu (MEJD), Armindo Maia liu husi mensajem ba Estudante sira iha timor laran tomak atu labele tauk mai simu vasina Pfizer. Tuir mensajem kumpletu MEJD:

Ba estudante sira lalika tauk, governu hanoin diak ba imi, no governu esforsu tomak liu hosi belun parseiru sira hakarak tulun ita. Vasina ne’e tempu uluk imi sei kiik, “buat ida naran Imunisasi” ka imunizasaun ne’e kontra moras Covid ne’ebe sai ameasa boot ba mundu tomak no ba Timor-Leste

Tanba imi idade sei kiik, konserteza presija autorizasaun inan aman nian, ne’eduni husu baa man inan sira, favor, se imi hadomi imi nia oan sira, tenke fo konsentimentu ba imi nia oan sira atu mai simu vasina. Uniku dalan ita atu prevene moras aat ida ne’e

Media Gab Min MEJD : João Bosco Xavier Carvalho

MEJD : Aimoruk atu Kura Moras Covid Seidauk iha

Molop, Bobonaro 9 Outubro 2021, (Sapientia)-Ministru Edukasaun Juventude no Desportu, Armindo Maia iha nia diskursu informa, governu buka aimoruk prevene moras ida nee. No to’o oras ne’e aimoruk atu kura moras Covid seidauk iha. Maibe, iha deit maka aimoruk prevene liu husi vasina ne’e deit.

Vasina hanesan biru ida ne’ebe atu satan ita nia isin lolon atu labele  kona moras covid ninian.

Durante fulan hira laran, Bobonaro tauk vasina! Tanba rona komunidade Suku Lour, Sra. Hilaria de Jesus ne’ebe mate, hafoin simu vasina. Maibe, depois mate haloot, komunidade Lour  entuziasmu ba simu vasina. Hatudu katak, Hilaria nia mate la’os tan vasina. Maibe distinu, maromak mak bolu nia.

Komunidade Lour, hakarak vasina tanba hakarak  proteje an husi moras ne’e. rona iha fatin barak katak, ema la vasina, maka mate barak.

Ne’eduni husi komunidade Suku Molop labele tauk vasina.

Maibe, tempo agora ba oin ami sei lafiar notisia falsu sira ne’e  no ami sei kontribui makaas ba vasina ida ne’e atu salva ami nia vida.

Administrador Postu Administrativu Bobonaro, husu komunidade iha Suku Sibuni atu partisipa iha vasinasaun  no simu vasina, objetivu atu populasaun sira bele livre husi moras Corona.

Labele rona lia bosok sira ne’e husi media social sira. Ema sira lori lia falsu sira ne’e, laiha responsabilidade moral hatudu ba populasaun sira.

Numeru populasaun Suku Sibuni neebe simu vasina sei kiik hela.

Reprezentante Ministra saude, Dr. Noe, imporante komunidade sira hotu tenke simu vasina. Professor/a sira tenke sai hanesan promotor saude nian promove kampaña vasina iha baze.  Fo informasaun loos ba komunidade sira, tanba komunidade sira tau konfiansa metin ba profesór sira.

Enkoraja nafatin  familia sira. Governo nia intensaun diak. Tanba ne’e, parte saude esforsu an atu proteje populasaun tomak husi moras aat ne’e.

Media. Gab.Min. MEJD : Joao Bosco Xavier Carvalho

 

Pesquisa