Dili, Sexta-feira, 15 Marsu 2024
Sua Eselénsia Ministra Edukasaun Dra. Dulce de Jesus Soares partisipa iha serimónia resesaun aniversáriu Pontifikadu Sua Santidade amu papa Francisco ba dala sanulo resin ida (11) iha embaixada Santa Sé, Motael, Dili.
Iha Serimónia ne’e, S.E. Prezidente Repúblika Dr. José Ramos Horta iha diskursu hateten, Ohin selebra aniversáriu pontifikadu sua santidade Papa Francisco, iha momentu ida ne’e, hanesan reprezenta povu no Governu Timor-Leste hato’o felisitasaun ba sua santidade Papa Francisco. Maromak haraik bensaun, vida saudável atu nune’e kontinua promove paz ba mundu nomós hala’o misaun igraja katólika nian.
Aleinde ne’e, reprezentante sua santidade amo Papa iha Timor Leste Sr. Monsenhor Marco Sprizzi hateten, agradese ba prezensa hotu iha ne’e hodi selebra loron nasionál Santa Sá nian, tanba ne’e agradese espesiál ba S.E. Prezidente Repúblika Dr. José Ramos Horta nomós S.E. Primeiru Ministru Kayrala Xanana Gusmão ne’ebé firme ho apoiu amizade dezde inísiu to’o agora.
“Relasaun diplomata entre Santa Sé ho Timor-Leste hahú dezde Timor-Leste ninia independénsia iha loron 20 fulan Maiu tinan 2002, Sante Sé halo ona komitmentu ida hodi garante relasaun espesiál hanesan relasaun família ida justu no garantidu ho Timor-Leste”, dehan Monsenhor Marco Sprizzi.
Serimónia aniversáriu Santa Sé ba dala-11 ne’e partisipa husi Prezidente Republika, Primeiru-Ministru, Amu Cardeál Metropolitana Dili, Eis Primeiru Ministru, Membru Governu no Korpu Diplomátiku Sira.
