ME ho ITB Asina akordu Bilateral ba Politéknika

Dili, 21/02/2014 - Atu promove politéknika iha Timor-Leste Ministériu Edukasaun hala’o asina akordu bilateral ho Institutu Teknolojia Bandung, Indonesia (ITB) atu halo dezeñu mapamentu kona ba kustu orsamentu ne’ebé atu gasta ba konstrusaun Politéknika 3 no akademia peska 1 iha nasaun ida ne’e.

Hafoin asina akordu bilateral, Ministru Edukasaun Bendito Freitas ba Jornalista sira, Sexta feira, 21/02/2014 iha Hotel Timor hateten katak, asina akordu ida ne’e hanesan inisiu atu halo prosesu konstrusaun politéknika no akademia peska tuir orsamentu jeral estadu ba seitór edukasaun atu dezenvolve institutu politéknika iha timór laran hanesan institutu politéknika enjineria nian ne’ebe tuir planu atu harii iha distritu Suai, institutu politéknika turismu no hotelaria iha distritu Lautem no institutu politéknika agrikultura iha distritu Same no akademia peska iha distritu Manatuto.

Esforsu hotu ne’ebé halibur no mós aprovasa husi konsellu ministru, maka Ministériu Edukasaun hamutuk ho ITB, atu hahu halo ona dezeñu mapamentu nian ba politéknika 3 ho akademia peska ne’ebé Ministériu planu atu dezenvolve iha ita nia rai laran ho objetivu atu bele buka kualidade edukasaun ba jovem sira iha área siensia teknika nian.

Durasaun kontratu ne’e sei hahu iha tinan ida ne’e nia laran konaba deseñu, ida ne’e liu husi prosesu negosiasaun ne’ebe naruk maibe konsege hetan akordu ho ITB, garante katak iha tinan ida ne’e bele remata halo mapamentu no bele hahu ona konstrusaun tuir orsamentu ne’ebe iha.

ITB nia reputasaun ne’e makaas, iha parte téknika nian iha rejiaun Asia no mos iha rekuñesementu nasaun balun iha mundu ne’eduni maka Ministériu halo servisu hamutuk ho sira atu halo ita nia institutu politéknika ho kualidade diak.

Iha fatin hanesan Reitor ITB, Akmajani hateten, sira nia prezensa iha Timor, tanba Ministériu Edukasaun Timor-Leste maka husu atu servisu hamutuk konaba atu harii politéknika no akademia peska iha nasaun foun ida ne’e. maibe akordu dahuluk sei halo mapamentu de’it, durante fulan 6 nia laran. Karik iha kontinuasaun, husi parte rua sei tur hamutuk asina tan akordu maka bele la’o ba oin.

Ba ITB, iha esperensia barak konaba prosesu dezenvolvimentu politeknika nian tanba ne’e prosesu konstrusaun kualidade sei garante metin no dura ba tempu naruk.