UNITAL no UNDIL sai Institusaun Ensinu Superior nebee Akreditadu.

Dili, 20/02/2014 - Universidade Oriental (UNITAL) no Universidade Dili (UNDIL) ofisialmente sai ona institusaun Ensinu Superior nebee akreditadu i akreditasaun Institusional ne sei validu ba tinan 5 no iha obrigasaun atu submete ba akreditasaun programatiku iha futuru.

Lia fuan nee hato’o husi Ministru Edukasaun, Bendito Freitas ba jornalista sira Kinta feira (20/2/14) iha sala konferensia Ministeriu da Edukasaun hafoin halo konferensia da imprensa hodi anunsio ba rezultadu Akreditasaun ba universidade rua.

“Ohin ita hamutuk iha nee hodi fo sai ba publiku rezultadu servisu konaba prosesu akreditasaun ba institusoens Ensino Superior rua UNDIL no UNITAL nebe kontribui tebes ba dezenvolvimento rekursu humanus Timor-Leste no priense ona kriteria hotu,”dehan Bendito.

Ministru Eduksaun husu ba universidade rua nee atu halo nafatin kooperasaun hamutuk nune bele kumpri ninia kondisoens kriteria nebee mak fo sai ona iha jornal da Republika no Institusaun Superior mak hanesan fontes importante no prinsipais nebee lori kuadrus sira ba merkadu de trabalho mundo nebe iha dezafius no kopetisoens barak teb-tebes .

“Ita nia joven oan sira, buka asesu ba Ensino Superior no hakarak ba buka hotu deit UNTL, maibe agora bele mos tau naran iha UNDIL no UNITAL nebe sai mos ona institusoens akreditada, parseirus importante ba ita nia guvernu, prinsipalmente dezenvolvimento siensias akademika ba ita nia future,” esplika Bendito

Bendito realsa katak universidade rua nee mos hatudu duni ona sira nia kualidade bazeia ba criteria avaliasaun pontu 8 hanesan misaun institusioanal, Guvernu no manajamentu administrativu, programa akademiku, Curikulum, strutura dosensia , proprioridade no finanseiru

Avaliasaun nee rasik halao iha Outubru 2013 husi avaliador internasional Prof.Dr.Nirwan Idrus husi Malásia no Dr.Manuel Corpus husi Filipina no husi Timor Sra.Dirce Belo.Iha avaliasaun nee ho objetivu hodi avalia no observa fatus nebe’e hetan no kondisaun real husi universidade rua nee.

Iha parte seluk konaba universidade balu nebee akreditadu loke klase parellelu, Bendito hatete, Ministeriu Edukasaun iha kompetensia tomak halao hela estabelesementu regulamentu atu limita ou taka klase paralelu tanba razaun kondisaun no universidade hotu-hotu tenki konsentra lai ba institusional atu dezenvolve iha nivel nasional, tanba iha distrito balu, estudante foin akaba pre-Secundária tama kedas ba klase paralelu.

Iha fatin hanesan Reitor Universidade Dili (UNDIL) Antonio Cardoso sente kontente tebes tanba Ministeriu Edukasaun ofisialmente fo sai universidade ida nee hanesan Instituisaun Ensinu Superior nebee akreditadu.

“Ami sente kontenti tebes tanba ami nia universidade nee hetan konfiansa husi Ministeriu da Edukasaun hodi fo akreditasaun ba ami nia universidade no ami hein katak ho akreditasaun nee ami bele servisu hamutuk liu tan ho ministeriu da edukasaun hodi hadia nafatin ami nia sistema iha universidade laran,”dehan Antonio Cardoso.

Reitor UNDIL nee esplika liu tan katak, sira mos konteti tanba valor nebee mak Ministeriu fo la hanesan ho ho akreditasaun ida uluk nebee ho valor nebee mak la kondiz ho realidade nebee mak iha.

Iha parte seluk, Antonio Cardoso mos sujere ba Ministeriu Edukasaun atu tau matan ba apoiu orsamentu ba kontinuasaun bolseira nebee fo ba universidade nee tanba universidade nee iha bolus estudu ba Portugal sei dauk lao tanba laiha osan ba transporte.

Nune mos Reitor Universidade Oriental (UNITAL) Roberto Geronimo hatete, sira simu akreditasaun nee ho laran haksolok i sira mos sei hakas atu hadia nafatin sira nia kualidade da instituisaun atu nune sira bele hetan nafatin apoiu no konfiansa husi Ministeriu Edukasaun.

“Ami sei servisu makas nafatin, tanba ho akreditasaun ida nee sei aumenta tan ami nia responsabilidade atu lori universidade nee ba era global nian no bele produz ita nia joven sira tanba sir a bele kiak maibe sira matenek tebes,”dehan Roberto.