ME - UNESCO diskute programa prioridade ba Edukasaun

Dili, 05/02/2014 - Ministeriu Edukasaun no United Nation Educational Scientific and Cultural Organization (UNESCO), hala’o sorumutu konaba intervensaun programa passado no futuru iha Timor-Leste.

Hafoin sorumutu ne’e halo iha Quarta-feira , 05/02/2014, iha Hotel Timor Dili. Ministru Edukasaun Bendito Freitas, informa ba jornalista sira katak, programa importante husi Ministériu Edukasaun diskute hamutuk ho UNESCO mak hanesan fundus emerjensia ne’ebe iha tempu passado apoiu husi UNESCO hanesan formasaun profesór sira no dezenvolvimentu ba dalen materna no mós komisaun siensia ba matemátika nian ne’ebé importante tebes no mós direitór Regional UNESCO husi Jakarta, Indonesia, halo aprezentasaun konaba programa kooperasaun ne’ebé estabelese entre governu Timor-Leste no UNESCO.”

Iha sorumutu ne’e Ministru Edukasaun preokupa liu ba dezenvolvimentu sistema edukasaun no kurrikulu atu reforsa profesór sira iha área siensia matemátika ne’ebé presija duni tau atensaun makaas iha area ne’ebá.

Ne’eduni Iha okaziaun ida ne’e atu haree modelu kooperasaun ba oin halo nusa mak bele ajuda no bele defini hanesan planu estratejia liuliu dezenvolvimentu ba área edukasaun tékniku vokasional no asegura guarda nasional hodi promove kultura no mos asuntu seluk konaba edukasaun iha parte siensia nian ba dezenvolvimentu sustentavel .

Ministru Edukasaun aumenta liu tan katak Ministeriu Edukasaun kontinua fo kolaborasaun hamutuk ho UNESCO no sira mós iha estrutura ba futuru no tenki dezenvolvimentu dalen inan ou lian materna espesialmente fokus ba koñesementu siensia nee.

“Ita haree katak siensias nee importante ba ita nia dezenvolvimentu liuliu rasosinu ka matemátika sira nee.Tanba ida nee maka ita presija ita nia oan sira hetan edukasaun ne’ebe rezultadu makaas liu ba siensia nia. Tanba ida nee mak prioridade planu asaun ne’ebe mak tenki aplika maka formasaun ba profesór sira iha área siesia nee, tenik Bendito.

Ho aprezentasaun husi UNESCO nian bele indika lós ona katak prinsipais fundamentu ba kooperasaun nee saida no bele haree ba futuru diak liu tan atu junta praseria ida ne’ebe sólidu no orientadu ba dezenvolvimentu sentífiku ba dezenvolvimentu rekursu no mós fó protesaun ba kultura timór nian.

Iha fatin hanesan reprezentante UNESCO Timor-Leste, hateten, enkontru ida ne’e husi Governu timor ho organizasaun internasional UNESCO, liu husi reprezentante UNESCO regional husi Jakarta ho reprezentante timor leste diskuti konaba kooperasaun bazeia ba rezultadu apoiu husi UNESCO mai governu presiza hanoin didiak ba futuru nian.

UNESCO pretende kontinua apoiu timor leste liuliu iha Asia, maibe tenke tuir UNESCO maka hili nune’e saida maka diak no saida maka ladiak durante apoiu sira ne’e tanba ne’e maka kria diskusaun ida ne’e atu haree lisuk no tau hanoin ba futuru mai.