Issue ME Manipula Merende Eskolar, Carlito Mota: “Informasaun Nee Lalos”

DILI - Director Nasional Asaun Social Eskolar, Ministeriu Edukasaun, Carlito Mota desmente maka’as informasaun nebee hatete, Ministeriu Edukasaun (ME) halo manipula programa merenda eskolar. “Se maka dehan ida nee. Informasaun ne’e lalos. Hatete buat ruma tenke hatudu faktus konkreta para bele detekta lolos,” desmente Carlito Mota ba jornlista iha ninia servisu fatin, Segunda (7/10).

Nia hatete, durante ne’e iha sira nia ministeriu seidauk akontese manipulasaun ba programa ruma hanesan merenda eskolar. Kuandu dehan, iha failansu, “Hau la nega, failansu nee iha. Mas, atu halo manipulasaun, ida nee seidauk akontese iha nee”.

Nia fo kestionasaun maka’as ba liafuan “manipulasaun”. Se mak dehan nee, ninia sentidu saida?. “Hau hakarak hatete ba publiku tomak katak, durante ne’e ami sempre servisu seriu. Ami esforsu a’an. Buat nebee ladiak, ami tenta halo diak, inklui programa merenda eskolar. Ami sempre hanoin, halot programa refere ho diak. Tansa mak dehan fali, ami halo manipulasaun?. Kuandu tuda liafuan manipula ba ami, tenke hatudu evidensia ruma, labele tuda fatuk subar liman. Ida nee lalos” katak Carlito Mota.

Nia rekonenese, programa merenda eskolar iha failha duni tanba OGE 2013 sai tarde. Iha primeiru trimestral la lao. Kuandu osan iha, entaun buat hotu iha. Osan laiha buat hotu laiha. “Manual programa merenda eskolar mos sai tarde,depois ami sei dezamina imformasaun konaba saida mak hakerek iha manual ba direktores Eskola Ensinu Básiku Central (EEBC) sira,tanba ne’e mak presija lori tempu husi Janeiru to’o Maiu ne’e la ejekuta, tama ba fulan Junu-Jullu mak merenda eskolar lao,”nia hatete.

Tuir lolos, iha fulan Agustu, sei lao, maibe relatoriu ne’ebe mak husi eskola sira hatama mai failla barak, tanba ne’e presija halo verifikasaun ba relatoriu, tanba husi relatoriu hateten katak, husi Diretores eskola ensinu baziku sira gasta hanesan ne’e maibe resultadu verifikasaun akontese saldo bo’ot liu fali gastu, tanba ne’e mak haruka sira hadia fila fali ,ne’e mak prosesu kleur impaktu ba programa merenda eskolar paradu, portantu hahu fali iha fim Setembru .

“Tanba ne’e iha preriodu terseiru trimestre ne’e alunus sira ne’ebe mak iha Teritoriu tomak han deit loron sanulu resin ida tanba depois loron refere feriadu ona merenda eskolar laiha,maibe ema ruma mak sei ejekuta osan iha tempu feriadu ne’e mak ita bele dehan manipula,”nia informa.

Agora dadaun estudante sira han to’o iha 12 de outobru atu kompleta loron 11 hodi tama ba ferias, dia 13 Outobru mak Director eskola balun sei kontinua ejektuta osan ba merenda eskolar nebe sei buka tuir tanba manipula.

Tuir nia, osan restu ne’ebe mak la gastu hotu sei kontinua tau iha konta bankaria director eskola, sira atu nune orsamentu jeral ba tinan 2014 tarde hein orienta deit tanba eskola sei tama fali iha dia 7 de Janeiru ,osan restu iha konta bankaria director hein deit orientasaun atu kontinua merenda eskolar ne’e labele tarde,maibe kuandu osan restu fila fali ba konta bankaria tinan oin nia prosesu transferensia ne’e kleur no programa kontinua tarde.

Nune’e orsamentu ne’e mak ki’ik labele kobre iha primeiru trimestre ba estudante iha Teritoriu tomak, sira sei rezolve ho fundus kontilijensia tanba fundus refere Ministeriu Edukasaun hetan porsentu 25, atu rezolve programa merenda eskolar, Karik iha orsamentu ne’e mak sei la to’o nafatin, sei ajuda ho orsamentu dua desimu atu nune orsamentu tarde merenda eskolar kontinua lao, ida ne’e mak mekanismu ba futuru atu programa refere labele faila bebeik. “Tanba failla bebeik mos ema hateten ita lahatene halo servisu,tanba ne’e mak ho mekanismu refere bele hadia failansu ne’ebe mak sempre akontese ne’e mak ami tenki palneia maibe Ministeriu mak deside” nia hatete.

Parte seluk Estudante Maria Fatima hatete katak, iha sira nia eskola, merenda eskolar la lao iha fulan Agustu ne’e maibe agora ne’e kontinua lao hikas iha Fulan Setembru ne’e, nebe sira mos komesa han diak hela, maibe lakleur tan sira mos sei feriadu.

Tuir Obesrvasaun Jornalista STL hare iha terenu katak oras ne’e dadaun estudante sira nebe mak sei dauk feriadu ne’e merenda eskolar sei lao hela, iha eskola balu mak feriadu ona, nebe sei kontinua fali iha tinan 2014. Guilhermina Franco

Fontes : Suara Timor Lorosae