Diskursu S.E. Dulce de Jesus Soares Ministra da Educação, Juventude e Desporto Iha Okaziaun Abertura ba Workshop Lian Jestual...

Hotel JL Vila, Dili 13 Junu 2019
Hau nia respeitu ba:
Sra. Armanda Berta dos Santos, Ministra da Solidariedade Social e Inclusão;
Sra. Carli Shillito, Konsellera ba Dezenvolvimentu Umanu, Embaixada Austrália (ka: Sr. Troy Scaleskog, 1º Sekretáriu, Dezenvolvimentu Umanu, Embaixada Austrália);
Reprezentante sira hosi eskola sira – AGAPE no Madre sira hosi ALMA sisters, Boruma,
Sr. João Pequeno, Diretór, Ra’es Hadomi Timoroan (RHTO);
Reprezentante sira hosi ADTL no KDTTL;
Bainaka sira hotu no liu-liu kolega media sira.
Dader diak no benvindu.
Ohin ha’u mai loke kolókiu ida-ne’e kona-ba uza lian jestuál iha eskola. Enkontru ida-ne’e tékniku teb tebes, no importante liu ba Ministériu Edukasaun, Juventude no Desportu atu bele hahú hala’o planu no pasu sira ba oin hodi serbi ho di’ak liu labarik sira ho nesesidade edukativu espesiál oioin, liuliu ho populasaun ne’ebé tilun larona.
Hanesan Ita-Boot sira hotu hatene, iha lian jestuál oioin ne’ebé uza iha eskola sira iha ita-nia rai. Maibé maioria eskola sira-ne’ebé hola inisiativa atu serbi ba komunidade defisiénsia tilun nian mak eskola privadu, no to’o agora Ministériu seidauk fó apoiu másimu ba eskola sira-ne’e, no mós ba sira-nia integrasaun ho sistema públiku nian. Maibé situasaun ida-ne’e oras ne’e atu muda! VIII Governu Konstitusionál hakarak asegura katak Polítika Edukasaun Inkluzivu la’ós liafuan de’it, ka dokumentu ida-ne’ebé rai hela hanesan ‘checking the box’ ida.
Lae, ami tau kedas iha programa Governu katak Edukasaun Inkluzivu sai área prioridade, tuir ita-nia Planu Dezenvolvimentu 2011-2030 mós tau prioridade aas ba Inkluzaun Sosiál. Nune’e, ha’u haruka katak asaun hotu ne’ebé hala’o atu asegura partisipasaun másimu iha edukasaun hosi labarik sira HOTU mak tenke planeia pasu por pasu, no importante liu tenke iha REZULTADU konkretu. Nune’e, planu tinan ida-ne’e hahú ho pasu balu ne’ebé Ministériu presiza halo atu asegura katak ninia planu asaun la’o ho efetivu.

Hahú ho hametin parseria ho Ministériu sira seluk hodi halo triangulasaun dadus, ne’ebé oras ne’e iha liman. Ami ko’alia ona ho parseiru Embaixada Austrália atu fó apoiu ba ami atu bele hamoos no analiza dadus sira-ne’e, hodi ami bele halo planu di’ak no bazeia ba evidénsia. Liu husi prosesu ne’e ami deskobre katak dadus barak la kompletu, nune’e tinan oin Ministériu Edukasaun, Juventude no Desportu sei konsentra ba formasaun atu koordenadór eskola sira hotu hatene uza ho loloos pergunta Washington sira, atubele deteta ho fasil liu labarik sira-ne’ebé iha risku atu iha nesesidade edukativu espesiál. Ami hein katak detesaun sedu no ho loos liu sei ajuda Ministériu atu fornese tulun ne’ebé presiza, karik la’ós tulun hotu ne’ebé estudante sira hotu iha territóriu tomak presiza dala ida, maibé ho planu komprensivu ida-ne’ebé bele implementa fazeadamente.
Mundu ho ninia mudansa teknolójiku sira mós sei ajuda Ministériu asegura katak labarik sira hotu sei aprende. Ami hahú ona planu atu fornese asesu ba e-learningba eskola sira hotu, no liuhosi ida-ne’e bele loke odamatan atu uza teknolojia ne’ebé ajuda labarik sira ho dezafiu oioin atu aprende – iha mundu e-learning iha apoiu espesiál ba sira ne’ebé matan la haree, tilun larona, sira ho disléksia no problema aprendizajen sira seluk. Nune’e ami sei estuda posibilidade sira hotu ne’ebé bele fó benefísiu no igualdade oportunidade ba estudante sira hotu, no mós sempre rona Ita-Boot sira-nia ideia.
Hanesan ha’u dehan ona, enkontru ida-ne’e tékniku tebetebes, no bele haree katak partisipante sira importante liu la’ós ema ho pozisaun aas hosi Ministériu Edukasaun. Tansá?
Tanba workshop ida-ne’e ba Ita-Boot sira. Ita-Boot sira-ne’ebé karik la rona ha’u, maibé lee ha’u-nia ibun ka komprende liuihosi tradutór. Ita-Boot sira-ne’ebé haka’as an atu aprende lian jestuál, atubele hanorin sira-ne’ebé tilun la rona ho di’ak hanesan ema seluk. Ita-Boot sira mak tenke lidera prosesu sira hotu ne’ebé relasiona ho Ita-Boot sira-nia sektór.
Ita-Boot sira mak peritu! Ministériu identifika katak impedimentu ida atu la’o ba oin hodi hanorin lian jestuál mak katak seidauk iha konkordánsia kona-ba lian jestuál. Nune’e, Ministériu husu Ita-Boot sira atu deside entre Ita-Boot sira kona-ba oinsá hakarak Ministériu hanorin lian jestuál. Ami prontu atu simu ideia no rekomendasaun sira hotu, maibé ami LA PRONTU atu impoin desizaun ruma ba Ita-Boot sira. Ha’u rasik laiha direitu atu halo desizaun ba ida-ne’e tanba ha’u rasik la uza lian jestuál. Ha’u iha responsabilidade atu halo polítika bazeia ba evidénsia no koñesimentu tékniku. Ha’u prontu atu simu rekomendasaun sira hosi Ita-Boot sira, no depois halo despaxu ne’ebé presiza atu asegura katak Ministériu halo tuir.
Ami hein katak kolaborasaun di’akliu ho sektór oioin sei ajuda kria relasaun ne’ebé fiar malu no ajuda malu. No relasaun metin ne’e sei prodús rezultadu konkretu sira ba populasaun vulnerável oioin, atu ita-nia Polítika Edukasaun Inkluzivu la’ós saugati de’it, maibé tau iha prátika atu ajuda atinji rezultadu katak labarik sira hotu sei iha oportunidade hanesan ba edukasaun ho kualidade. Tan ne’e ha’u mai atu loke workshop tékniku ne’e – atu hatudu Governu nia kompromisu aas ba serbisu ida-ne’e.
Ho ida-ne’e, ha’u loke workshop. Orasida loraik Ministériu fiar katak sei simu rezultadu no ita sei implementa hamutuk.
Obrigada.