VICE-MINISTRO DA EDUCAÇÃO, JUVENTUDE E DESPORTO HASORU MALU HO SENADÓR JENERAL SURACHET CHAIWONG

Bankók, Tailándia, 07 Juñu 2019 - Vice-ministro da Educação, Juventude e Desporto Eng. João Zacarias Freitas Soares hasoru malu ho eis Vice-ministro da Educação, Tailándia no agora Senadór Jeneral Surachet Chaiwong iha almosu hamutuk ne'ebé oferese husi Senadór Surachet.

Timor-Leste hetan konvite espesial hodi Vice-ministro ho delegasaun inklui estudante no orientadór sira ba tuir Scout Jamboree Ceremony bainhira Senadór sei assume kargu hanesan Vice-ministro da Educação durante halao vizita ofisial mai Timor Leste husi loron 25 to'o 27 Abril 2019.

Iha introdusaun Senadór Surachet hato'o bem-vindu no agradese ba Vice-ministro ho delegasaun hodi konsidera ba konvite no bele hamutuk ho estudante eskuteiru Tailandés parte leste hodi selebra koroasaun Liurai Rama X iha 4 Maiu 2019 ne'ebé troka nia aman Liurai Bhumibol Adulyadej (Rama IX) mate iha Outubru 2016 hafoin ukun tinan 70.

"Hau sei lembra metin hela hau nia vizita dahuluk ba Timor Leste. Fotografia sira ho Ita no estudante sira durante vizita hau rai diak no haruka ba Liurai. Hau kontente tebes ho vizita no hospitalidade ne'ebe imi hatudu ba hau. Hau agora iha Parlamentu maibe sei esforsu hodi apoiu nafatin Timor-Leste liu-liu iha area edukasaun. No hau hakarak buat hirak ne'ebé ita koalia tenke kontinua nafatin." haktuir membru Parlamentu Tailándia ne'e.

" Hakarak hato'o hau nia apresiasaun no agradese ba Ita nia suporta ba Timor Leste hahu uluk bainhira Ita sei ativu iha militar. Ita bo'ot maneja no fo treinamentu ba militar Tailándia hodi partisipa iha Peace Keeping Force iha Timor Leste no to' o agora kontinua tau konsiderasaun espesial ba Timor Leste." dehan Vice-ministro João.

Parte rua konkorda atu mantein komunikasaun no fahe informasaun ba malu hodi suporta nafatin Timor Leste liu-liu iha setor edukasaun.

Embaixadór Repúblika Demokrátika Timor Leste ba Reinu Tailándia Sr. Joaquim Amaral akompaña mos Vice-ministro ho delegasaun iha han meiu-dia hamutuk ho Senadór Surachet ho ofisial sira husi Gabinete Senadór no reprezentante Ministério da Educação, Tailándia.

HOTU

#MediaGabineteVMEJD