DNIE-MEJD HO PNDS ASINA DOKUMENTU TÉKNIKU BA PROJETU KONSTRUSAUN ESKOLA

10/06/2019, Ministériu Edukasaun, Juventude no Desportu liu husi Diresaun Nasionál Infraestrutura Eskolár (DNIE-MEJD)hala’o asinatura ba dokumentu tékniku ho Programa Nasionál Dezenvolvimentu Suku (PNDS), dokumentu tékniku hanesan, Dezeñu, BoQ, no oráriu ba implementasaun projetu komunitáriu kona-ba rehabilitasaun no konstrusaun Eskola iha Munisípiu 7 (hitu).

Hafoin asinatura dokumentu tékniku sira Diretór Nasionál DNIE-MEJD, Sr. Helío informa katak, asinatura dokumentu tékniku ne’e kontinuasaun implementasaun ba akordu entre MEJD ho MAE ne’ebé asina husi Ministra Edukasaun, Juventude no Desportu, Dulce de Jesus Soares ho Vice Ministru no Ministru Interinu Administrasaun Estatál, Abílio José Caetano iha fulan Maiu 2019.

Total projetu hirak ne’ebé sei implementa husi PNDS hamutuk Eskola sia (9), ho total sala de aula hamutuk 27 no kada eskola hetan sala de aula hamutuk tolu (3). Total orsamentu kada eskola kuaze $ 52.000,00 (Rihun lima nulu resin rua dolar Amerikanu). Projetu hirak ne’e sei implementa iha 2019 nia laran no sei implementa iha Munisípiu 7 mak hanesan, Baucau, Bobonaro, Covalima, Ermera, Manufahi, Viqueque no Lautem.

Sorumutu ne’e partisipa mós husi Diretór Jerál Polítika, Plano no Parseria (DGPPP-MEJD), Sr. Antonino Pires, Xefe Gabinete Jurídiku MEJD, Diretora PNDS, Sra, Dulce Guterres Junior no Ekipa Tékniku husi PNDS.