LORON MUNDIAL BA LABARIK

MINISTRA DULCE : “ INAN AMAN SIRA TENKE SAI MODELU BA LABARIK SIRA”
06/06/2019, Ministra Edukasaun, Juventude no Desportu, Dulce de Jesus Soares, Partisipa iha selebrasaun loron Mundial ba labarik ne’ebé realiza iha Munisípiu Baucau iha loron 06 Juñu 2019.

Iha mundu tomak selebrasaun loron mundiál ba labarik nia selebra iha loron ne’ebé diferente. Loron internasionál ba labarik selebra iha loron 01 Juñu no loron Universal ba labarik selebra iha loron 20 Novembru.
https://pt.wikipedia.org/wiki/Dia_das_Crian%C3%A7as

Iha tinan 1924, International Save the Children Union publika testu primeiru deklarasaun internasionál direitu ba labarik, ne’ebé adota husi nasaun sira iha mundu. Dokumentu original arquiva iha Genebra, ne’ebé iha asinatura Eglantyne Jebb, fundadora Save the Children, polonês Janusz Korczak no-mós polítiku suisa Gustave Ador. https://pt.wikipedia.org/…/Declara%C3%A7%C3%A3o_Universal_d…

Timor-Leste rasik iha tinan ida ne’e selebra loron Internasionál ba labarik iha loron 01 Juñu, ne’ebé komisaun direitu ba labarik iha Timor-Leste hamutuk ho parseiru sira hala’o mós atividade oioin hodi selebra loron espesiál ba labarik sira. Selebrasaun ikus ba loron Mundial ba labarik hala’o iha Munisípiu Baucau, ne’ebé halo iha loron 06 Juñu 2019, iha Centro Convenção de Baucau. Atividade selebrasaun ne’e hala’o mós Semináriu Nasionál ho tema “ Investe iha Família, Prevene Esplorasaun ba labarik”.

Iha nia diskursu Komisária direitu ba labarik Sra. Dinorah Gradaneiro hateten, selebrasaun loron mundiál ba labarik importante ba labarik atu nune’e labarik sira haksolok hodi selebra sira nia loron iha atividade oin-oin ho haksolok. Komisária ne’e mós informa katak selebrasaun loron mundiál ba labarik iha Timor Leste hala’o durante loron tolu nia laran iha Munisípiu Baucau. Komisária hatutan tan katak, labarik sira iha diretu atu hetan protesaun tuir konvensaun direitu ba labarik.

Iha fatin hanesan Ministra Edukasaun, Juventude no Desportu Dulce de Jesus Soares hato’o katak “Inan aman sira tenke sai modelu ba oan sira, nune’e oan sira ba-nati tuir hahalok di’ak inan aman nian ba buat di’ak, tanba oan sira nia futuru responsabilidade inan-aman nian”. Ministra aprezenta katak, tuir dadus sensu 2015 katak labarik tinan 0-18 liu metade populasaun Timor Leste ( porsentu 50,7). https://www.moe.gov.tl/…/Databook%202014%20Final4_for%20Pri…

Ministra Dulce hato’o katak, knar Ministériu Edukasaun nian mak atu garante protesaun ba labarik sira, liu-liu ba dezenvolvimentu labarik sira, partisipasaun labarik sira nian, nune’e iha implementasaun direitu ba labarik tenke hare husi parte ida integradu hodi bele responde ba direitu labarik nian tuir konvensaun direitu ba labarik.

Ministra Edukasaun, Juventude no Desportu mós informa liu tan katak lei inan (Konstituisaun) Timor-Leste garante direitu ba labarik. Tuir dadus Ministériu Edukasaun labarik tinan 3-18 ne’e asesu ba edukasaun kuaze 30%, nune’e MEJD iha responsabilidade atu garante edukasaun ida kualidade ba labarik hotu iha Timor- Leste ne’ebé iha direitu atu asesu ba edukasaun.

Mesajen espesiál Ministra Edukasaun, Juventude no Desportu mak “hato’o parabéns espesiál ba labarik sira iha Timor-Leste, Profesór sira, inan no aman sira, ba na’i-ulun sira ne’ebé luta atu garante duni direitu labarik nian iha Timor-Leste bele la’o ho di’ak liu tan”.

Selebrasaun ne’e partisipa husi estudante sira iha Munisípiu Baucau, Ministra da Edukasaun, Juventude no Desportu, Deputada Maria Gorumali Barreto, komisária Direitu ba labarik, Prezidente Autoridade Munisípiu Baucau, Komandante Polísia Munisípiu Baucau, parseiru sira, Profesór sira no inan aman sira.