VICE-MINISTRO DA EDUCAÇÃO, JUVENTUDE E DESPORTO PARTISIPA IHA SEREMÓNIA ABERTURA SCOUT JAMBOREE IHA CHONBURI, TAILÁNDIA

Chonburi, Tailándia, 05 Juñu 2019- Vice-ministro da Educação, Juventude e Desporto Eng. João Zacarias Freitas Soares partisipa iha seremónia abertura Scout Jamboree (Jamboree Eskuteiru) ne’ebé Timor Leste reprezenta husi estudante ensinu sekundáriu nain 8 no orientadór (manorin) nain 2 husi loron 5 to’ o 9 Juñu 2019.

Atividade ne’ e hanesan kontinuasaun husi selebrasaun ba koroasaun Liurai Rama X iha 4 Maiu 2019 ne’ ebé troka nia aman Liurai Bhumibol Adulyadej (Rama IX) mate iha Outubru 2016 hafoin ukun tinan 70.

Timor Leste hetan konvite espesial husi Ministério da Educação, Tailándia, bainhira Vice-ministro da Educação Tailándia Jeneral Surachet Chaiwong halao vizita ofisial ba Timor Leste husi loron 25 to’ o 27 Abril 2019.

Iha diskursu abertura Vice-ministro hodi governu Timor-Leste no Exelénsia Sra. Dulce de Jesus Soares, Ministra da Educação, Juventude e Desporto kongratula povu Tailándia ba koroasaun Liurai Rama X no agradese ba eis Vice-ministro da Educação Jeneral Surachet Chaiwong ne’ ebe agora halo knar hanesan senadór iha Parlamentu Tailandia hodi fo oportunidade nasaun Timor-Leste hola parte iha seremónia istóriku ida ne’ e.

“ Ida ne’ e hanesan onra no privilejiu ba estudante sira husi Timor Leste , hodi hamutuk iha ne’ e ho eskuteiru nain rihun neen (6.000) resin husi provinsia 8 iha reijiaun leste, Tailándia hodi espiriénsia Jamboree Eskuteiru. Hau fiar katak estudante sei aprende barak husi sira nia maluk eskuteiru sira husi Tailándia durante sira nia tempu iha Jamboree ne’ e ”, haktuir Vice-ministro ho lian Inglés.

Hatutan tan katak estudante sira nia involvimentu direta iha atividade Jamboree nian durante loron 5 sei fila ho espetativa no esperitu foun hodi hariku sira nia koñesementu no esperiénsia partisipa no habelar dezenvolvimentu eskutismu iha Timor Leste.

Iha biban ne’ e mos Vice-ministro rekoñese kooperasaun diak entre rai rua hahu husi 1999 no iha area edukasaun liuliu Princess Mahacakri Program. Prinseza Mahacakri sei vizita Timor Leste iha semana oin hodi hare implementasaun atividade sira husi programa ne’ e.

Partisipa iha seremónia abertura mak Sr.Prasert Boon ruang, Vice Sekretáriu Permanente Ministério da Educação, Tailándia, Vice Governadór Provinsia Chonburi, Sra. Duriya Amatavivat, Sekretáriu Permanente Ministério da Educação Tailandia, Vice-ministro Eng. Joao Zacarias Freitas Soares ho delegasaun no estudante no orientador sira husi parte leste Tailándia hamutuk rihun neen resin.

Molok ne’ e, Vice-ministro ho delegasaun iha dadersan halao uluk vizita ba Chonburi College of Agriculture and Technology, hodi observa pratika diak no dezenvolvimentu kurríkulu iha area agrikultura no teknolojia.

Vizita Vice-ministro ne’e simu direitamente husi Diretor Interinu Chonburi College of Agriculture and Technology Dr. Kiat Siam Limtrakun no Asesor Senior Sra. Jerdruedee Chinvaroj husi Komisaun Edukasaun ba Vokasionál, estudante no profesor sira.

HOTU

#MediaGabineteVMEJD