Cai-Laco-20/05/2019, Ministra Edukasaun, Juventude no Desportu, Dulce de Jesus Soares, reprezenta Prezidente Repúblika sai nu’udar Inspektora Serimónia Isar Bandeira hodi komemora loron Restorasaun Independénsia ba dala 17, iha Postu Administrativu Cai-Laco, Munisípiu Bobonaro.
 

Iha ámbitu komemorasaun loron Restorasaun independénsia ba dala 17, Ministra Edukasaun, Juventude no Desportu hetan nomeasaun husi Konsellu Ministru hodi preside serimónia isar bandeira iha Munisípiu Bobonaro, Postu Administrativu Cai-Laco. Alien de ne’e Ministra mós lee diskursu Prezidente Repúblika nian ba loron Restorasaun independénsia ba dala 17 iha loron 20 Maiu 2019 ba komunidade sira iha Munisípiu Bobonaro, espesiál ba komunidade iha Postu Cai-Laco.
 
Serimónia loron Restorasaun Independénsia ba dala 17 iha Postu Administrativu Cai-Laco hetan partisipasaun no apoiu masimu husi nivel munisipál to Postu Administrativu liu-liu husi Veteranu, autoridade lokál, PNTL, F-FDTL, Funsionáriu, Seguransa Sivíl, Bombeiru, profesór no estudante sira inklui komunidade Suco 8 husi Postu administrativu Cai-Laco.
 
Tuir observasaun husi Ministra Edukasaun Juventude no desportu, Dulce de Jesus Soares katak, serimónia isar Bandeira iha Postu Administrativu Cai-Laco kuaze laiha diferensa ho Nasionál, tanba ekipa Isar Bandeira ne’ebé hetan treinamentu no akompañamentu husi PNTL no F-FDTL nune’e serimónia la’o ho di’ak tebes.
 
Ministra mós informa katak, alien de Serimonia isar bandeira iha mós expozisaun ne’ebé fó oportunidade ba komunidade sira atu hatudu no fa’an sira nia produtu no mós iha atraksaun oin-oin hodi ha-rame serimónia ne’e, nune’e komunidade sira sente duni katak komemorasaun loron Restorasaun Independénsia hanesan festa ba komunidade hodi ema hotu-hotu bele festeza loron importante ida ne’e. Tema ba selebrasaun ba tinan ida ne’e mak “HAFORSA UNIDADE NO GARANTE ESTABILIDADE, ATU HALAO DEZENVOLVIMENTU NASIONAL”.