MEJD REALIZA SESAUN TRABALLU LORON RUA, HODI DISKUTE PLANU ASAUN 2020

Maubara,06/05/2019, Ministériu Edukasaun, Juventude no Desportu (MEJD) realiza sesaun traballu loron rua iha Maubara, hodi diskute kona-ba Planu Asaun Annual MEJD 2020. Sesaun traballu ne’e partisipa husi Dirijenti sira husi MEJD, Diretór Edukasaun Munisipál, Pontu Fokál Planeamentu no Finansas, Asesór sira no Reprezentante husi Ministériu Finansas no UPMA.

Ministra Edukasaun, Juventude no Desportu, Dulce de Jesus Soares informa ba jornalista sira katak, agora da-daun MEJD komesa diskute ona Planu Asaun ba 2020, nune’e MEJD hakarak involve ema hotu iha prosesu ida ne’e nune’e ema hotu iha MEJD bele iha sentidu de Pertense ba Planu Asaun atu bele ezekuta planu asaun ho di’ak no halo monitorizasaun ba nia implementasaun.

Governante ne’e informa liu tan katak, MEJD mós konvida reprezentante husi Ministériu Finansas hodi halo aprezentasaun ba prosesu ezekusaun orsamentu iha Timor-Leste, nune’e mós husi Departamentu Education Management Information System (EMIS) iha MEJD ne’ebé mak aprezenta kona ba dadus iha MEJD.

Ministra Dulce mós aprezenta katak, iha sesaun traballu ne’e sei diskute kle’an area prioridade sira ba Ministériu Edukasaun, Juventude no Desportu iha tinan 2020 iha loron rua nia laran. Tema ba sesaun traballu ne’e mak, “ Garante um plano de Acção Annual Holístico e Sentido de Pertencer em todo Processo”.