MEJD NO KFP FAHE SERTIFIKADU PENSAUN NIAN BA PROFESÓR NO FUNSIONÁRIU MEJD

Dili.02/05/2019, Komisaun Funsaun Públika (KFP), fahe sertifikadu pensaun nian ba benefisiáriu husi Ministériu Edukasaun, Juventude no Desportu (MEJD), ne’ebé partisipa direita mós husi Ministra Edukasaun, Juventude no Desportu, Dulce de Jesus Soares no Diretór Jerál, Diretór Nasionál, no Diretór Munisipál sira husi MEJD.

Benefisiáriu sira ne’ebé hetan sertifikadu ba pensaun nian maka Profesór sira hamutuk 39 husi Munisípiu 13 no funsionáriu MEJD nain 3. Benefisiáriu hirak ne’e tama ona ba idade reforma no sira hato’o sira nia pedidu ba Komisaun Funsaun Públika (KFP) ikus mai KFP aprova sira nia pedidu no fó sertifikadu pensaun ba benefisiáriu sira.

Iha serimónia ne’e Ministra Dulce hato’o nia agradesimentu boot ba benefisiáriu sira ne’ebé iha tinan barak ona fó sira nia kontribuisaun, dedikasaun no esforsu ba dezenvolvimentu Edukasaun iha Timor-Leste, liu-liu sira nia esforsu atu lori povu Timor nia oan sira husi nakukun ba naroman. Ministra subliña liu tan katak maski profesór sira ne’e reforma ona maibé husu nafatin sira nia kontribuisaun atu reforsa no halo akompañamentu ba dezenvolvimentu lian portugés iha eskola sira besik sira nia hela fatin, tanba kuaze profesór sira ne’ebé reforma kuaze hanorin husi tempu portugés to ukun rasik an.

Iha fatin hanesan Sekretária Ezekutiva Komisaun Funsaun Públika informa katak Lei Timor-Leste hatuur katak funsionáriu sira tama iha tinan reforma mak tinan 60, maibé Lei mós la obriga Funsionáriu sira ne’ebé tama ona tinan 60 tenke reforma, maibé KFP simu pedidu husi Funsionáriu sira ne’ebé hakarak atu reforma. Sekretária Ezekutiva ne’e esplika katak nu’udar ema ita mós iha tempu ida presiza deskansa hodi goza vida iha idade reforma nian, nune’e mós fó fali oportunidade ba foin-sa’e sira atu bele hetan oportunidade servisu.