ESKOLA SIRA IHA TIMOR-LESTE SEI PRESIZA 50.000 MEZA NO KADEIRA

Viqueque, 26/04/2019: Dadus Ministerio da Educação, Juventude e Desporto (MEJD) hatudu katak eskola sira iha Timor-Leste laran tomak sei presiza tan, porvolta 50.000 meza no kadeira.

Ministra da Educação, Juventude e Desporto, Dulce de Jesus Soares, esklarese kondisaun ida ne’e wainhira akompaña vizita ofisiál Sua. Excia. Prezidente da República, Dr. Francisco Guterres Lu-Olo, iha Munisípiu Viqueque (25-26/4/2019).

Objetivu prinsipál husi vizita Prezidente da República ne’e hodi halo diálogu ho komunidade no autoridade lokál Munisípiu Viqueque nian. Perante diálogu, komunidade espresa sira nia preokupasaun barak liu kona-ba dezenvolvimentu sektór edukasaun nian hanesan: asuntu infraestrutura eskolár, falta meza no kadeira, estatutu Profesóres Kontratadu no reklamante, asuntu retroativu ba profesór sira nia progresaun eskalaun.

Hatán ba preokupasaun hirak ne’e Ministra Dulce, esplika, Orsamentu Jerál Estadu (OJE) 2019 ba MEJD sei limitadu tebes. Ho orsamentu limitadu ne’e difikulta MEJD atu atende mós infraestrutura eskola sira ne’ebé mak hetan estragus hosi dezastre naturais ne’ebé akontese tempu hirak liu ba. Nune’e iha orsamentu tinan 2019-2020 sei hadi’a porvolta 45 eskola sira iha nivel hotu-hotu (Ensinu Pre-Eskolár, Ensinu Báziku, Ensinu Sekundáriu Jerál no Tékniku Vokasionál).

“tuir dadus Ministériu Edukasaun, Juventude no Desportu (MEJD), eskola sira iha Timor laran tomak sei presiza meza no kadeira hamutuk kuaze 50.000”, dehan Ministra Dulce. Nune’e iha futuru nia husu nafatin apoiu husi parte hotu tanba Prezidente da República rasik deklara ona katak, edukasaun mak prioridade nune’e iha orsamentu ba futuru mai MEJD sei hetan apoiu orsamentu sufisiente hodi rezolve problema eskola sira hasoru.

Hatán kona-ba estatutu Profesóres Kontratadu no reklamante sira, Ministra Dulce esplika, agora da-daun Profesóres Kontratadu kuaze 4.500 ne’ebé tuir hela kursu komplementar no formasaun akadémiku, MEJD servisu hamutuk ona ho Universidade Nacional de Timor-Leste (UNTL) hodi forma Profesóres Timor laran tomak. Ministra Dulce mós subliña, iha tinan 2019 ne’e sei rezolve problema Profesóres Kontratadu no reklamante nian.

Ramata - Media Gabinete Ministra