Ministra Dulce: “Presiza dadus transversal ida hodi sai báze ba planeamentu inkluzaun”

Lian hirak ne’e Ministra Dulce de Jesus Soares hato’o ba Jornalista sira wainhira partisipa iha sesaun de traballu entre Ministério da Educação, Juventude e Desporto, Ministério da Solidariedade Social e Inclusão, Ministério da Saúde no Secretária de Estado para a Igualdade e Inclusão ho tema “ hametin dadus Setor transversal Difisiensia nian”, iha Timor Plaza, 18/03/2019.

Ministra Dulce informa katak importánsia husi sesaun traballu ida ne’e atu Ministériu relevante sira bele partilla ba malu halibur dadus kona-ba labarik no adultu ho Difisiensia, nune’e dadus hirak ne’e sai dadus ida de’it hodi nune’e Ministériu relevante sira bele utiliza dadus refere ba planu no programa ministériu ida-idak nian. Ministra Dulce mós salienta liu tan katak atu promove edukasaun inkluzivu maka MEJD presiza dadus, tanba dadus mak sai báze ba planeamentu ne’ebé di’ak.

Iha fatin hanesan Vice-Ministra MSSI, Sra, Signi Chandrawati Verdial informa liu tan katak, sesaun traballu refere organiza husi Ministério da Educação, Juventude e Desporto, ho nia objetivu prinsipál atu halibur dadus. Vice-Ministra MSSI haktuir katak, tuir dadus kuaze 25000 ema ho Difisiensia ne’ebé la-iha asesu ba Edukasaun, nune’e dadus ne’e importante atu partilla hamutuk tanba kestaun ema ho Difisiensia ne’e kestaun transversal no interministérial nune’e bele tau polítika ida ne’ebé di’ak ba ema ho Difisiensia.

Partisipa iha sesaun traballu ne’e, Ministra MEJD Dulce de Jesus Soares, Vice-Ministru MEJD Eng. João Zacarias Freitas Soares, Vice Ministra MSSI, Signi Chandrawati Verdial, Secretário Estado Para a Igualdade e Inclusão Interino,Sr.Mário Ximenes, Diretór Jerál no Diretór Nasionál husi Ministériu Saude, MEJD, MSSI no SEII, inklui asesór sira no parseiru sira.