Ministra da Educação, Juventude e Desporto, Dulce de Jesus Soares, akompaña hosi Secretário de Estado Juventude e Desporto, Nélio Isaac Sarmento, no reprezentante SEPFOPE, Embaixada EUA, no Diretór UNDP

Dili, 9/3/2019: Ministra da Educação, Juventude e Desporto, Dulce de Jesus Soares, akompaña hosi Secretário de Estado Juventude e Desporto, Nélio Isaac Sarmento, no reprezentante SEPFOPE, Embaixada EUA, no Diretór UNDP nian iha Timor-Leste, Sr. Claudio Providas, lansa Laboratóriu Inovasaun 3D públiku primeiru iha Timor-Leste (7/3/2019), iha Knua Juventude Fila Liman, Dili.

Laboratoriu 3D nu'udar meius inovativu ida-ne'ebé hakarak fasilita juventude sira, liuhosi hasa’e sira-nia koñesimentu atubele halo inovasaun sira atu sai emprezáriu. Atu nune'e juventude sira bele hakbiit-an iha sektór ekonomia, hodi kria serbisu ba sira-nia an rasik, no loke mós kampu traballu ba ema seluk.

Laboratóriu 3D oferese treinamentu ba foin-sa’e sira, kapasita sira-nia koñesimentu kona-ba oinsá hamosu ideia inovativu sira, hahú hosi hanoin simples ruma ho efeitu ekonómiku ida produtivu ba sira-nia moris. Hosi ideia ne'e mak da’et ba inovasaun foun hodi hamosu negósiu foun sira, hanesan akontese iha rai boot sira hanesan Indonézia, Malázia, ne'ebé ema hanaran ‘start up business’.

To'o agora iha juventude hamutuk na’in-5.000 ne’ebé hola parte ka asesu ona ba programa empreendedorizmu ne'e iha Knua Juventude Fila Liman. Ministra Dulce husu ba joven Timoroan sira atu optimista liután ho sira-nia kapasidade, liuliu oinsá utiliza sira-nia kriatividade atu hamosu ideia foun sira-ne’ebé bele sai baze ba inovasaun ba negósiu foun iha Timor-Leste hodi benefisia sira-nia moris. Nia mós deklara katak VIII Governo Constituçional iha responsabilidade boot atu reforsa, haluan no hametin programa ne'e ba oin.

"Governu iha responsabilidade boot atu haluan liután programa ida-ne'e ba oin, liuliu atu fó oportunidade ba sentru hanesan ne’e iha munisípiu sira hotu. Buat ida mak ita presiza refleta iha programa ne'e mak hanesan alin ida-ne'ebé ohin hatete katak ‘thinking like a baby’, signifika katak, bainhira hahú negósiu ita labele hanoin kedas ema ne'ebe iha osan barak, maibé tenke hahú hosi buat ki'ikoan ida uluk lai. Tanba ne'e ami sei haree dalan oinsá atu kontinua programa ida-ne'e hamutuk ho UNDP, tanba programa ida-ne'e importante tebes," esplika Ministra Dulce iha ninia intervensaun.

Programa Laboratoriu 3D iha fatin iha sentru Knua Juventude Fila Liman (KJFL), inisia primeira vez hosi UNDP Timor-Leste, ho apoiu tékniku hosi Asia School for Business, eskola negósiu boot ida iha Malázia. KJFL mós hetan apoiu hosi Secretariado de Estado Para Política Formação e Emprego (SEPFOPE).

Knua Juventude Fila-Liman (KJFL) mak sentru integradu ba inovasaun no emprendedorizmu ba foin-sa’e sira, maneja/ patronizadu husi UNDP Timor-Leste. Iha sentru ne’e, foin-sa’e sira bele asesu informasaun, partisipa no hetan kbiit liuhusi atividade teknolójiku no hakbiit-an oioin hodi hadi’a sira-nia abilidade serbisu no badain emprendedorizmu, atu sira bele partisipa iha lori ita-nia dezenvolvimentu ba oin.

Timor-Leste nia futuru ekonómiku depende ba haburas sektór privadu.