VICE-MINISTRO EDUCAÇÃO, JUVENTUDE E DESPORTO OFISIALMENTE LANSA PRIMEIRU AULA ESTV PÚBLIKA LACA LORI, CAILACO, BOBONARO

CAILACO, 4/02/2019
Cailaco- Vice-ministro Educação, Juventude e Desporto Inj. João Zacarias Freitas Soares hamutuk ho Diretór Jeral, Diretór Nasional sira ho Prezidente Autoridade Munisipiu Bobonaro hamutuk ho autoridade lokal sira ofisialmente lansa primeiru aula Eskola Sekundáriu Tékniku Vokasionál, Laca Lori, Cailaco ba tinan letivu 2019 iha loron 4 Fevereiru 2019.

Komunidade sira ho inisiativa rasik hamutuk ho Intelektual no alumni EBC Biadila hakarak harii ESTV ne'e hodi hatán ba nesesidade estudante sira nian hafoin remata tiha estudu iha Ensinu Báziku tenke ba postu administrativu seluk ka Dili hodi kontinua estudu iha nivel sekundáriu. Nune'e Vice-ministro fo apresiasaun ba Komisaun Organizadora Estabelesemento ESTV Públika Laca Lori katak " molok to'o iha faze ida ne'e hau hatene no konsiente katak la fasil, maibé hau apresia no orgullu ho imi nia esforsu tomak ne'ebé imi tau hamutuk no ohin loron ita bele halo lansamentu ba primeiru aula. Buat ne'ebé importante hosi susesu ida ne'e mak imi nia kolaborasaun, dedikasaun no domin hodi harii eskola ida ne'e. Ne'e hotu tanba imi hakarak eskola ida ne'e bele fasilita no produz estudante-sira hosi rai ida ne'e, ne'ebé ikus mai bele sai hanesan rekursu diak ida ba rai Cailaco no ita-nia rai doben Timor-Leste".