Ezame Nasional Ano Letivu 2017

Ezame Nasionál ba tinan letivu 2017 hahú iha loron 23/10/2017 abertura husi Ministru Edukasaun no Kultura Prof. Dr. Fernando Hanjam ho-nia komitiva sira iha Munisípiu Liquiça Postu Administrativu Maubara.

Abertura ne’e hala’o iha eskola ensinu Sekundáriu Jerál Liquiça hanesan mós monitorizasaun badahuluk iha Ezame Nasionál ne’e, hafoin vizita Eskola Sekundária Públika Númeru 1 Laulara, Eskola Bázika Sentrál Besilau, Ensinu Báziku Laulara, ensinu Sekundáriu Jerál Malere Munisípiu Aileu, hodi observa situasaun ezame iha eskola refere sira, iha loron 24/10/2017.

Situasaun Ezame Nasionál la’o normál, maske iha estudante balun maka la partisipa ho razaun ne’ebé la justifika. Tuir Ministru Edukasaun no Kultura Prof. Dr. Fernando Hanjam hateten planu Ministériu nian ne’ebé seidauk ultrapasa ho situasaun maka agora daudauk Ministériu Edukasaun no Kultura enfrenta maka oinsá atu rezolve sala sira ne’ebé insufisiente ba estudante sira. Tuir loloos rásio normál kada sala maka 25 to’o 30 maibé balun to’o fali 50 ka 60.
Problema seluk maka relasaun ho profesór/a no ekipamentu infraestutura.