EBC Fatumea sei falta fasilidade


Eskola Ensinu Báziku Sentrál Públiku (EBC), Sub Dis­tritu Fatumea, Distritu Covalima sei falta fasilidade hanesan sala ba prosesu aprendizájen sei menus, ar­majen atu rai fós merenda eskolár laiha no hakarak husu ba ministériu edukasaun atu fó tan formasaun bá profesór kontratadu na’in rua (2) ne’ebé oras ne’e sei nafatin kon­tratadu.
Kestaun ne’e hato’o husi Diretór EBC Sub Distritu Fatumea, António de Deus Lima B.ed bá Buletin Sapiénsia iha nia serbisu fatin Suai Covalima.

Eskola ida ne’e iha nia alunu hamutuk ema na’in 251. Ho profesór hamutuk ema na’in 13. Pro­fesór sira husi ema na’in 13 ne’e, ema na’in 2 maka sei iha kontratadu. Ne’e duni husu ba ministériu atu fó forma­saun ba sira. Nune’e sira bele tama ba rejime karreira dosente nian.

Kadeira no meza ne’ebé oras ne’e sira uza ba prosesu aprendizájen hamu­tuk 66. Ita hatene katak, ho númeru kadeira meza sei menus, estudante balun tenke tuur iha rai tuir prosesu aprendizájen.

Edifísiu ne’ebé utiliza dadaun ba pros­esu aprendizájen hamutuk 3, ho-nia sala 9. Ma’ibé sala hirak ne’e kondi­saun ladun di’ak ba alunu sira tanba iha sala laran parede nakfera jenela ho odamatan laiha.

Entretantu, Ministro Edukasaun Bendito dos Santos Freitas iha nia entrevista ba jornalista sira hateten, ba eskola sira ne’ebé sei falta fasilidade hanesan ka­deira meza no sala de aula, ministériu oras ne’e hakas-an ona atu responde priokupasaun sira ne’e iha tempu badak!!!!