VMEJD: LA IHA VONTADE ATU SERBI’I, DIAK LIU REZIGNA-AN.

Novu Turismu/Lesidere, 15/11/2018.

Vice-Ministru Edukasaun, Juventude no Desportu João zacarias Freitas ho lian makas iha intervensaun ba aktividade workshop ne’ebe realija husi MEJD no parseiru dezenvolvimentu UNICEF, ba objektivu dezenvolvimentu sustentável (ODS). Sorumutu ne’e rasik hakarak fahe ekseperensia hodi transforma sistema edukativa no hasa’e kapasidade ba planeamento setór edukasaun aliña prinsípiu ODS nian, hodi funda planu setór ida ne’ebe diak liu.
Governante ne’e Hateten durante tinan barak ona edukasaun Timor-Leste dezenvolve nia an iha setór ida ne’ebe diak liu, tambá edukasaun rasik iha peritus edukasaun timor oan ne’ebe kontinua kontribui ba dezenvolvimentu ne’e.

Lian makas ne’ebe konsege João Zacarias Freitas hasai liu husi sentimentu la satisfas ba atetude husi direktor nasional sira no sefi departamento sira ne’ebe, abitua ka toman la tau importansia ba aktividade workshop ne’be koordena husi MEJD no UNICEF.
VMEJD husu ba direktor nasional sira no sefi departamento sira ne’ebe karik la iha vontade hodi serbi’i ba estadu no rai ida ne’e bele rejigna an. Nia hateten tenki kuda iha fuan ba interesse nasional ho valor nasionalismu no patriotismu, nune’e bele valoriza ema rihun ba rihun ne’ebe mate no terus ba rai ida ne’e. Nia reforsa tan katak ema matenek barak ona, ne’ebe mós mak prontu ona atu serbi ba rai ne’e maibe sei iha liur, tambá sidauk hetan oportunidade. Nune’e labele tau hanoin ida katak kargu ne’e oportunidade, maibe nia hateten kargu ne’e responsabilidade. Lia hirak ne’e João Zacarias hato’o wainhira hala’o observasaun ba aktividade workshop ne’e no hare ba partisipasaun ne’ebe direktor sira la fo importânsia hodi la marka prejensa.

Aliende ne’e João Zacarias Freitas reprejenta MEJD hodi husu diskulpa ba UNICEF tamba atetude husi direjente ministériu nian ne’ebe la fo partisipasaun maksimu, nia mós hateten nu’udar Vice ministru persija atu hola disijaun ruma hamutuk ho nia superior ba ema ne’ebe la iha vontade ba aktividade nasional sira ne’ebe importante.