DNB realiza treinamentu ba Profesór sira


Ministériu edukasaun (ME) liu husi Dir­esaun Biblioteka Eskolár fó treinamentu ba profesór na’in 75, husi Ensinu Báziku Sen­trál (EBC), no mós husi ensinu Sekundáriu Distritu 13. Objetivu formasaun ne’e atu hasa’e kapasidade hodi halo jestaun ba bib­lioteka eskolár iha futuru. Formasaun ne’e hala’o durante loron 2 iha fulan Jullu tinan 2014, iha salaun ensinu rekorrente Vila- Verde Dili.

Marçal Avelino Ximenes, Vise Ministru En­sinu Superiór no siénsia, hatete, durante ne’e livru sira soe arbiru de’it, tan ne’e presiza in­formasaun husi formasaun hanesan ne’e atu bele hatene haloot livru ne’ebé relasaun ho kurríkulu iha sira-nia fatin.

“Ita bele hatene katak sala ba biblioteka laiha, liu-liu ba eskola públika no barak maka sei­dauk hetan biblioteka, loloos ne’e sala ba­biblioteka iha. Karik, profesór sira bele jere sala eskola ida ne’ebé mak uza ba prosesu aprendizájen ba sala biblioteka nian,”dehan Marçal ba jornalista sira iha salaun ensinu rekorrente Vila-Verde, Dili.
Marçal esplika liután katak husi nia parte sei ko’alia ho diretór eskola hotu atu oinsá sira prontu ka disponível atu uza sala ida sai bib­lioteka ba eskola. ME-nia planu sei presiza no aumenta sala ba eskola sira nune’e sala balun bele utiliza ba biblioteka nian, aléinde ne’e sei iha mós sala ba laboratóriu no planu iha 2015 sala hirak ne’e bele uza ona.

Iha fatin hanesan Paulo Henrique Nunes, Diretór Nasionál Biblioteka, hatete formasaun ba jestaun biblioteka eskolár ne’e hanesan formasaun ba períodu daruak ne’ebé maka períodu dahuluk hala’o tiha ona iha fulan ko­tuk no sei iha mós períodu datoluk.

Paulo esplika katak, formasaun ida ne’e atu fó hanoin ba jestór sira hotu katak bele hadi’a tanba sala biblioteka iha eskola públika iha! Maibé, utilliza fali ba prosesu aprendizájen nian no sei halo konsolidasaun ho profesór sira oin nusá maka uza sala sira ne’e.

Eskola ne’ebé mak laiha sala ba biblioteka Paulo dehan “ida ne’e Ministériu-nia planu liu husi diresaun infrastrutura bele tau iha planu atu bele aumenta tan sala ba biblioteka no mós sala ba laboratóriu I ida ne’e hanesan planu ba 2015 tanba husi etapa ba etapa.”

Paulo esplika liutan katak livru sira ne’ebé tau iha biblioteka mak hanesan livru kona-ba ensinu aprendizájen ne’ebé iha ligasaun kur­ríkulu foun nian kona-ba ensinu Báziku no ensinu sekundáriu no iha mós livru hanesan referénsia/(bacaan tambahan) maibé ida ne’e seidauk sufisiente atu responde hotu nesesi­dade iha eskola. Tanba ne’e maka, presiza au­menta livru ne’ebé liga ba kurrikulu hanesan livru referénsia.

Tuir Paulo katak, benefísiu kria biblioteka ba alunu sira no profesór hanesan jestór atu mo­tiva sira oinsá utiliza livru iha biblioteka nian hodi halo diskusaun. Ne’e duni, formasaun ida ne’e importante tebes ba profesór sira atu jere didi’ak biblioteka ne’ebé maka iha ona. Nune’e, alunu sira bele utiliza ho di’ak.