ME simu esperiénsia Cabo Verde

Halo Melloramentu Edukasaun Iha Timor-Leste
Enkontru ida ohin ME halo ho institutu universitáriu Cabo Verde nian ne’ebé vizita husi Doutor Florencio Mendes Varela ne’ebé fahe-nia esperién­sia kona-bá evolusaun prosesu edukasaun iha Cabo Verde nian durante tinan hirak ne’ebé sira hahú sira-nia independén­sia liuliu ko’alia kona-ba área ne’ebé ligadu tebes ba formasaun profesór no mós kona-ba lian hanesan instrumentu ba ensinu.

Iha Cabo Verde, sira ko’alia lian rua mak hanesan portugés no Kriolu hanesan lian inan Cabo Verdiana nian. Konteúdu ne’ebé iha konsiénsia no politikamente edukasaun ida atu la’o di’ak tenki hahú ho lian portugés hafoin tinan 39 hanorin ho portugés.

Wainhira Caboverdianu sira ba forma iha rai liur hanesan Portugal , França, Brazil no Inglaterra tinan 39 foin maka sira dezenvolve sira-nia es­trutura linguístika ho Kriolu ne’e hodi sai hanesan língua ba ensinu. Sira prepara sira-nia rekursu umanu no dezenvolve ona estrutura lin­guistika, ne’e husi parte hotu lin­guistika nian depois atu hanorin. Tanba ne’e maka hanesan elementu ida ne’ebé haree hanesan diferente tebes wainhira sira bele enfrenta situasaun kona-bá kestaun no op­saun ba lingua no ensinu tanba sira mós hatene no konsente katak hahú ho Kriolu kedas laiha rezultadu tanba laiha baze no fundamentu ida preparadu hafoin tinan 39.

Kona-ba partilla husi Doutór Var­ela rasik kona-ba ensinu superiór katak esperiénsia Cabo Verde nian hatudu katak husi tinan dahuluk governasaun nian sira la loke uni­versidade maibé konsentra liu husi ensinu báziku tanba hanesan fun­damentu prinsipál tebes ba dezen­volvimentu edukasaun.

Sira ne’ebé mak estuda ba nível universitáriu, haruka maior parte ba rai liur no sira-nia universidade rasik loke, foin mak iha tinan hitu. Ne’e, hatudu universidade Timor- Leste nia ezisténsia, tinan kleur liu Cabo Verde sira maibé sira ho rekoñesimentu ida katak sira ba iha liur absolve siénsia hotu hafoin ho kuñesimentu intelektuál hotu, sira dezenvolve di’ak iha siénsia ne’ebé di’ak tebes iha Cabo Verde no ohin loron sira ho polítika ida katak sira tenki sai os melhores dos melhores.

“Sira dehan katak sira-nia estadu ne’e mikro estadu ou estadu ne’ebé mak ki’ik oan entaun sira-nia rekursu po­tensiá l ne’e depende tebes ba kapitál umanu tanba ne’e mak sira buka atu maksimiza potensialidade husi parte hotu, dehan Bendito.

Investimentu ki’ik-oan hanesan mós iha Timor-nia orsamentu estadu ki’ik maibé, sa’e to’o hetan 27% iha tempu ikus liu iha investimentu edukasaun ho konsiénsia katak edukasaun maka xave ba demokra­sia ba mudansa sosiedade akontese wainhira povu hetan edukasaun di’ak atu kumpriende valór sosiál no
demokrasia atu respeita malu.

“Ha’u hanoin esperiénsia ida di’ak tebes husi Cabo Verde. ne’e be ha’u hanoin katak ita presiza atu rona no hametin liutan ita-nia polítika atu bele reformula ita-nia ajustamentu polítika sira atu hatán ba sitausaun susar sira ne’e.

Kona-ba formasaun ba pro­fesór ne’e mós, iha vizita ba INFORDEPE, nia haree katak INFORDEPE hanesan mós iha tinan hirak liubá, wainhira sira hahú sira-nia konstrusaun es­tadu, sira-nia independénsia ho limitasaun hotu maibé nia haree katak importánsia bo’ot liu hotu mak dalaruma depende de’it ba universidade nasionál iha fakuldade siénsia edukasaun atu bele produz profesór ba ensinu la to’o tanba ne’e mak Cabo Verde iha sira-nia polítika dezenvolve institutu superiór edukasaun ida ne’ebé maka foka tebes ba dezen­volvimentu teknolojia sientífika husi dosente sira.

“Ita ho Cabo Verde hanesan momentu ida importante tebes ne’e be iha kontaktu atu iha konkordánsia ruma atu bele es­tabelese akordu. Tanba ne’e mak ha’u hanoin iha duni polítika planu integradu tama ona komi­saun simeira CPLP nian serbisu hamutuk ho ita-nia prezidente komisaun Dr.Lu-Olo no Minis­tériu Negosiu Estranjeiru hodi haree área kuoperasaun tanba edukasaun ba ita imporatante tebes, ”dehan Ministru Edukasaun.

Tuir Bendito katak presiza loke oda­matan atu bele iha estudante ruma ba estuda iha Cabo Verde no presiza mós interkámbiu tékniku dosente liuliu iha área ne’ebé presiza iha edukasaun hodi aprende husi nasaun Cabo Verde nian ne’ebé mak ki’ik-oan maibé bele sai “os melhores.”

Bendito esklarese katak vantajen mai Timor mak presiza akompaña situ­asaun ne’ebé mak Cabo Verde sira transmite mai Timor no presiza tetu no halo avaliasaun ba polítika eduka­saun nian no mantéin área ne’ebé mak presiza espasu atu bele dezenvolve di’ak liután no presiza hadi’a liután atu bele produz polítika integrada.