“Fase liman importante, nune’e bele hadook ita husi moras”- Ministra Dulce


Dili, 23/10/2018: Mantein liman mós ne’e mak hahalok ida importante no saudavel tebes, ho nune’e mak ita sei evita-an hosi moras no hada’et mós baktéria no virus ba ema seluk.
Loron 15 Outubru konsidera hanesan loron komemorasaun internasionál nian ba fase liman nian. Iha selebrasaun loron fase liman global ba tinan 2018 ne’e koko liga asuntu fase liman ho ai-han no nutrisaun di’ak. Liu hosi fase liman mak tékniku di’ak tebes hodi ajuda ita nia ai-han seguru.
Ministerio da Educação, Juventude e Desporto (MEJD) konsidera komemorasaun loron fase liman global hanesan importante tebes, tanba asuntu refere inklui ona iha matéria saúde ijene ba prosesu aprendejiazen ba alunu sira iha ensinu hotu-hotu iha Timor-Leste.

Aproveita loron fase liman global ba tinan ida ne’e, MEJD selebra iha hamutuk iha Eskola Bázika Filial (EBF) Manleu, Dili, partisipa direita hosi Ministra da Educação, Juventude e Desporto, Dulce de Jesus Soares, no akompaña hosi Espósa Prezidente da República, Sra. Cidália Lopes Nobre Mouzinho Guterres.
Hola parte mós iha selebrasaun ne’e reprezentante hosi Ministério da Saúde, Autoridade Suku Manleu no Comoro, Profesora no Estudante EBF Manleu, inklui mós reprezentante hosi ajénsia parseria dezenvolvimentu sira.
Ministra Dulce esplika katak, fase liman ho sabaun, tenke sai nu’udar atitude báziku ida iha sosiedade, ne’ebé tenke habelar iha sosiedade Timór laran tomak. Hodi nune’e bele proteje ema hotu, tantu hosi labarik to adultu sira hodi livre husi moras.
Tuir pontu de vista MEJD nian, saúde no ijiene bele kontinua sai atitude ida bázika no importante. Nune’e iha Kurríkulu Pre-Eskolár, Ensinu Báziku to’o Ensinu Sekundaria, estudante sira aprende Saúde Ijiene.
Ministra Dulce mós agradese ba EBF Manleu ne’ebé iha kooperasaun ho parseiru dezenvolvimentu sira hodi bele selebra loron ne’e. Ministra mós enkoraja parseiru dezenvolvimentu sira atu kontinua inisia no habelar programa ida ne’e ba eskola hotu-hotu, liu-liu eskola sira iha area remotá sira.
“Agradese tebes ba vontade di’ak hosi EBF Manleu, ne’ebé koopera ho ita nia parseiru dezenvolvimentu sira hodi realiza eventu selebrasaun ida ne’e.” Dehan Ministra dulce, “No hau enkoraja mós parseiru dezenvolvimentu sira atu habelar inisiativa ida ne’e to’o iha eskola sira iha area remotá sira.” Ministra Dulce.
Ministra Dulce aprezenta mós katak, MEJD prioritiza ona fasilidade infra-estrutura saneamentu ba eskola sira iha planu annual tinan 2019 nian. Signifika katak, hahú tinan oin wainhira MEJD atu konstrui eskola ruma, tenke kompletu ho nia fasilidade sira, hanesan bee, hariis fatin, eletrisidade, mesa, kadeira, armáriu no seluk tan, hodi nune’e alunu no profesór sira foku de’it ba ensinu aprendizajen.
Kada tinan Timor-Leste sempre selebra loron mundiál fase liman ho sabaun. Kampaña Fase liman ho sabaun importante tebes ba labarik sira, nune’e labarik sira bele hatene ho di’ak importánsia husi fase liman, tanba bainhira la-fase liman baktéria no virus sira sei belit ba ita nia liman nune’e bele fó impaktu ba hamosu moras.