UNICEF entrega eskola 23 Filial ba ME

Aileu, 04/04/2014 - UNICEF intrega ofisialmente konstrusaun eskola Filial hamutuk 23, husi distritu lima Aileu, Viqueque, Manatuto, Ermera no Oecuse ba guvernu liu husi Ministériu Edukasaun.
Eskola hirak ne’e nia konstru­saun tomak husi UNICEF ho nia fasilidade bé mós no saneamentu sei benefisia ba estudante hamutuk ema na’in 8700. Tuir planu, iha 2014 UNICEF mós sei halo tan Pré-Eskolár 7 ba distritu Aileu, Dili, Liquica Manatuto no Oecuse.

Serimónia ne’e simbo­likamente hala’o iha Eskola En­sinu Báziku Filial, Manutane, distritu Aileu, Sesta (04/04/14) no partisipa husi Primeiru Ministru Interinu Fernando Lasama de Araujo, Ministru Edukasaun interinu, Virgilio Smith, Vise Ministra Pré-es­kolár no Ensinu Báziku Dulce de Jesus Soares hamutuk ho reprezentante UNICEF Hungao Wei.

Ministru Edukasaun Interinu Virgilio Smith iha nia diskursu hateten Eskola foun ne’e la’os haree ba eskola foun, kadeira no meja foun maibé eskola foun haré liu ba aplikasaun me­todolojia iha eskola konabá ha­norin no disiplina iha sala laran atu nune’e motiva labarik sira halo atraksaun iha sala laran.
Iha Ministériu Edukasaun halo ona planu ne’ebé lidera husi Vise Ministra Dulce de Jesus Soares konabá reforma Kurrikulu liuliu Ensinu Pré-Eskolár, hahú ha­norin ho lian inan no programa ida ne’e mak sei hala’o hamutuk ho eskola foun.

Ministériu Edukasaun mós sei presiza aumenta sala 2.813. no programa ne’e Vise Ministra mak sei hala’o hela no la’os ida ne’e de’it presiza aumenta tan ekipamentu ba sala ne’ebé sei presiza.
Iha mós programa formasaun ba profesór sira atu forma tan profesór ne’ebé atu hanorin iha eskola foun ne’e. Atu bele kumpriende diak sistema no mekanismu prosesu aprendizájen iha sala laran.
Iha fatin hanesan Primeiru Ministru Interinu, Fernando Lasama hateten, UNICEF hasai osan hamutuk $50.000. (sinquenta mill dólares) hodi halo konstrusaun no hola ekipamentu sira ba eskola.
Lasama husu atu UNICEF kontinua fó apoiu ba konstrusaun eskola sira hanesan ne’e iha fatin seluk.
“Husu ba komunidade sira atu haruka imi nia oan ba eskola no labele husik sira halimar iha uma tanba tempu ida agora ne’e la’os tempu ba alfabetizasaun , husik labarik sira ba eskola atu bele troka fali ami jerasaun katuas nian,”dehan Lasama.

Husu mós ba komunidade sira atu tau konsiderasaun katak eskola mak fatin ba labarik sira buka matenek no bele serví ba nasaun. Ne’eduni husu ba komunidade sira atu tau matan ba eskola ne’e tanba UNICEF tulun ona guvernu hodi hadia kualidade eskola iha Timor.

Aleinde ne’e Lasama deklara katak bazeia ba órden primeiru Ministru Xanana Gusmão katak iha tinan 2014 tenki servisu maka’as liu tan, aselera konstrusaun sala eskola, kadera no meza.
Reprezentante UNICEF ba Timor-Leste, Hungao Wei hatete, durante tinan 2013 nia laran UNICEF ho Ministériu Edukasaun halo ona konstrusaun eskola 23 ho fasilidade bé mós saneamentu hanesan iha distritu Aileu, Viqueque, Manatuto, Ermera no Oekuse ne’ebé sei benefisia ba estudante 8700 no mós iha 2014 nia laran UNICEF sei halo tan Pré-Esko­lár 7 hanesan iha distritu Aileu, Dili, Liquica Manatuto no Oecuse

“Hau sente kontente duni tanba realiza duni projeitu halo eskola foun ida ne’ehola parte hotu husi eskola 23 iha distritu lima no ita sei hein katak eskola seluk sei intrega iha fula Maiu ou Junnu nia laran,”dehan Mei.
Iha biban ne’e Reprezentante UNICEF kongratula ba Guvernu ho nia komitmentu atu hadia kualiadde eskola prinsipalmente liu husi Ministériu Edukasaun partikularmente ba Diretór En­sinu Báziku ho nia ekipa tomak ne’ebé halo ona planu, bele realiza konstrusaun eskola iha Aileu bele garantia kualidade edukasaun Báziku ba labarik hotu iha komu­nidade nia leet.
Wei mós fó parabens ba inan no aman sira, komunidade no profesór sira nia apoiu tomak durante hala’o konstrusaun to’o intrega ba Ministériu Edukasaun.

reprezentante UNICEF Timor-Leste ne’e husu ba parte hotu-hotu atu kuidadu no tau matan ba edifísiu ida ne’e nune’e bele úza ba prosesu apredizájen nian. UNICEF nia papél atu tau ma­tan bá labarik sira liu husi hadia kualidade eskola atu labarik sira husi Ensinu Báziku bele produz rekursu umanu ho kualiadade di’ak.

Kordenadór eskola Filial,Mantane Aileu, José Pineru dehan Eskola ida ne’e hamu­tuk husi siklu dahuluk no siklu daruak inklui Pré-eskolár maibé husi eskola ida ne’e iha mós siklu dahuluk filial husi sala ida ne’e koloka fila fali ba iha Suku Erbuti.

José esplika liutan katak Total alunus hamutuk 316, mane 172, no feto 144. profesór hamutuk ema nain 16, permanente 14 no kontratadu na’in 2 no iha sigu­ransa nain ida, eskola ne’e iha sala foun tolu ida uza ba profesór sira no ida uza ba Biblioteka no iha haris fatin separadu ba Feto no Mane inklui bé mós.

Iha fatin hanesan, Diretor Edukasaun distrito Aileu, Izac Sarmento agradese ba parseria UNICEF Timor-Leste.
“no husu nafatin UNICEF fó apoiu nafatin wainhira eskola refere iha proposta ruma, bele tau hela konsiderasaun no agradese mós ba direitór kom­pania finaliza duni eskola ida ne’e maski hasoru difikuldade barak maibé kontinua esforsu to’o konklui eskola ne’e.