Pontu Ezame NasionalL 2018, Entrega no Distribui Ona Ba Munisipiu Sira


Dili, 11/10/2018-Ministerio da Educação Juventude e Desporto (MEJD), entrega ona matéria pontu ezame nasionál nian ba Diretór Edukasaun Munisípiu na’in-13 hodi distribui ba eskola sira. Ho nune’e ezame nasionál ba finalista sira iha tinan ida-ne’e bele realiza duni iha loron 15 Outubru 2018 mai.
Preparasaun ba materiál pontu ezame nasionál tinan ida-ne’e la’ós serbisu ida fasil, tanba parte kompetente sira iha MEJD serbisu iha liña koordenasaun ida sólidu tebes-tebes hodi garante prosesu impresaun remata tuir liña tempu ne’ebé determina ona. La’ós liña tempu de’it; ekipa serbisu mós foka ba kualidade impresaun no liuliu konfidensialidade ba materiál refere. Liuhosi koordenasaun ida di’ak tebes, no mós monitorizasaun ida-ne’ebé rigorozu tebes hosi Inspeção Geral (IG) MEJD nian, ikusmai preparasaun materiál ezame ne’ebé gasta orsamentu hamutuk 192,734 Dólares Amerikanu ne’e prontu duni ba realizasaun ezame nasionál tinan ida-ne’e.
João Mau Pelo, Koordenadór Sentru Impresaun MEJD nian esplika, “Funsionáriu MEJD hamutuk ema na’in-86 mak serbisu ba asegura impresaun matéria pontu ezame nasionál nian, hahú hosi 13 Setembru to’o 11 Outubru 2018.”
Prosesu impresaun ne’e prepara materiál pontu ezame ba alunu hamutuk ema na’in-50.548, refere ba sala aprendizajen 2.556, nune’e total dokumentu ne’ebé imprime ba ezame nasionál hamutuk 303.288 ezemplár ho detallu hanesan tuirmai: ba alunu finalista ensinu báziku hamutuk 30.021, total sala ezame 1.620, total pakote envelope 9.738.
Iha Ensinu Sekundária Jerál, iha matéria oin 6 ba Siénsia Teknolojia ho totál finalista hamutuk na’in-8.628, no sala ezame hamutuk 469, no pakote envelope 3.304. Tuir fali Siénsia Sosiais no Umanidade hamutuk matéria oin 6, no finalista 8.406, ba sala ezame 467 (pakote envelope 3.279). Matéria ba Ensinu Sekundária Tékniku Vokasionál hamutuk oin 4, totál alunu na’in-1.603, sala ezame hamutuk 89 no pakote envelope 905. Ba Ensinu Rekorrente iha alunu hamutuk na’in-140, ho sala ezame 6.
Perante serimónia entrega matéria pontu ezame nasionál, Vice-Ministru MEJD, Excia. João Zacarias Freitas Soares, agradese no hato’o parabéns ba tékniku sira Sentru Impresaun MEJD nian. Tanba konsege termina duni produsaun ba matéria ezame nasionál tinan 2018, maski enfrenta difikuldade oin-oin. Ministru Interinu MEJD (hahu 8 to’o 12/10/2018) ne’e espresa katak, ezame nasionál nu’udar faze krusiál hodi avalia alunu sira-nia progresu aprendizajen, no dalan ida atu sukat mak liuhosi ezame nasionál.
“Diretór Munisípiu no Diretór eskola sira hotu, favór realiza ezame nasionál ida-ne’e ho kalma no responsabilidade, atu nune’e bele asegura estudante sira-nia partisipasaun iha ezame nasionál ho di’ak. Ajuda alunu sira atu foka hodi atinje rezultadu ne’ebé di’ak. Kuidadu tebes-tebes atu labele fó espasu ba irregularidade ruma,” husu Excia. João Zacarias, iha Sentru Impresaun MEJD, Komoro, Dili.