ANGELA HO MANUEL REPREZENTA TIMOR-LESTE IHA ARGENTINA


Dili-MEJD, 1/10/2018: Ministra da Educação, Juventude e Desportu, Excia. Dulce de Jesus Soares, husik atleta estudante nain rua ba kompete iha eventu desportiva Youth Olympic Games (YOG), iha Buenos Aires, Argentina (https://www.olympic.org/buenos-aires-2018).
"Timor-Leste la’ós presiza deit eprezentasaun, maibé prestasaun mós," dehan Ministra Dulce iha sorumutu ho atleta nain rua, ho komitiva hosi Federasaun Atletizmu Timor-Leste nian.
Prosesu ba partisipasaun Agela ho Manuel ba YOG ne'e la’ós fasil, tanba sira na'in rua selesionadu kedas iha faze Pre-Kualifikasaun atletizmu nian iha Bangkok, Tailándia. Hafoin faze ida ne'e mak sira merese duni lori Timor-Leste nia naran ba Argentina.
Ministra Dulce apresia tebes ba esforsu Federasaun Atletizmu, ne’ebé konsege lori atleta sira hodi partisipa iha Alta-Kompetisaun, apresia mós atleta sira nia preparasaun, ne'ebé maski enfrenta hela limitasaun oin-oin, maibé konsege hatudu rezultadu di’ak tebes. Ho rezultadu pre-kualifikasaun, signifika federasaun Atletizmu Timor-Leste bele sukat ona atleta sira nia kbiit no kapasidade ba kompetisaun ruma too iha ne’ebé. Tan ne'e husu ba federasaun sira seluk atu banati tuir Federasaun Atletizmu.
"Presiza prepara ho di’ak, treinu maka'as, no tryout uluk hodi bele sukat ita nia forsa too iha ne'ebé. Ho nune'e mak ita merese reprezenta Timor-Leste iha alta-kompetisaun sira." Esplika Dulce.
Importante mós Federasaun sira atu identifika no define loloos Timor-Leste nia modalidade primadona hodi foku no dezenvolve ba, atu nune'e ita bele hetan rezultadu maximu iha eventu desportu boot sira iha nivel rejionál no mós internasionál. Ezemplu ita nia nasaun viziñu balu koñesidu ho modalidade favoritu hanesan badminton, no seluk tan. Ita tenke buka ita nian rasik no prepara halo didi’ak.
#Media_MEJD